Курапаты
Зьвесткі зь Вікіпэдыі — вольнай энцыкляпэдыі.
Курапа́ты — лясны масіў непадалёк ад Менску, дзе ў 1937-1941 годзе бальшавікі расстралялі ад 30 000 да 100 000 (па ацэнках некаторых дасьледчыкаў, да 250 000) чалавек.
У 1988 годзе ў Курапатах адбылася масавая антысавецкая дэманстрацыя, якая была жорстка разагнаная міліцыянтамі, з ужываньнем сьлезаточнага газу.
[рэдагаваць] Гісторыя назвы
Першым адкрыў праўду пра гэты лес Зянон Пазьняк. Вось што ён піша пра гісторыю месца і назву:
«Курапаты — гэта слова-сымбаль. Сымбаль страшнага злачынства расейскіх бальшавікоў супраць беларускай нацыі. Да 1988 году такога слова практычна не было ў беларускай мове. Ім карысталіся некалькі дзясяткаў чалавек вёсачкі Дроздава з дванаццаці хатаў, што ў Бараўлянскім сельсавеце пад Менскам. Калі я назваў свой артыкул пра сталінскі тэрор "Курапаты — дарога сьмерці", я ня думаў, што ўводжу новае слова ў беларускую мову і новы тэрмін у беларускую гісторыю, бо, па справядлівасьці, павінна было б прагучаць іншае слова — Брод. Так паўсюдна называлася тое ўрочышча, дзе забівалі людзей. Але ў Дроздаве я напаткаў яшчэ адзін назоў — Курапаты, магчыма пазьнейшы й паваенны».
«Слова, пачутае з вуснаў маладых хлопцаў, уразіла мяне мэтафарычнасьцю свайго сэнсу й гучаньня. мне тлумачылі, што Курапаты (ці Курапаткі) — гэта белыя веснавыя кветкі, якія там на магілах, растуць у траўні. Гэтыя кветкі ў Беларусі называюцца белыя пралескі, а на Віленшчыне яшчэ — курасьлепкі (бо вечарам і ў цёмнае халоднае надвор'е яны заплюшчваюцца, і як сарвеш — таксама). У іншым сэнсе курапаткі — гэта птушкі, на якіх палююць. Адсюль і выслоўе: "Пастралялі, як курапатак"».
«Мэтафарычныя асацыяцыі слова паўзьдзейнічалі на выбар назвы артыкула й месца расстрэлаў. Слова стала вядомае ва ўсім сьвеце».
[рэдагаваць] Сучасныя падзеі
У 1994 годзе Курапацкі лес наведаў Біл Клінтан і падараваў манумэнт — гранітную лаўку, якая стала, напэўна, першым помнікам-падарункам ЗША на тэрыторыі пост-савецкай Беларусі. Амэрыканскі помнік тройчы быў разламаны невядомымі вандаламі, але кожнага разу аднаўляўся зноў.
Узімку 2002 году моладзь і сябры Беларускага народнага фронту абаранялі Курапаты цягам некалькіх месяцаў ад будаўнікоў, якія пашыралі Менскую кальцавую дарогу.
29 кастрычніка 2004 году ў Курапатах адбылося ўрачыстае адкрыцьцё памятнага знака ад беларускіх габрэяў ахвярам сталінізму. Мэмарыяльны знак выраблены з каменя, які калісьці быў часткай помніка Сталіну ў Менску.
Штогод на Дзяды сотні людзей прыходзяць у Курапаты, каб памянуць тых, хто загінуў ад рукі бальшавікоў.
Прадстаўнікі ўладаў ігнаруюць праблемы Курапатаў.
