Mittelalter

Aus Wikipedia

De easchdn Heazög wan ab 555 n.Chr. de Agilofinger, oba scho unda de Merowinger is Baian Teil vom fränggischen Reich woan. 788 n.Chr. hod da Karl da Groaße an Heazog Tassilo III. gschlogn und de oidan Heazog damid auf'd'Zeidn brochd.

Dene eana Nidagang hods aba wieda meglich gmachd, daas de neian Heazög unabhängiga woan san und oanzlne Regionen san wieda schdeagga woan. Bsondas de Ungan ham de Baian 862 zamgschwoaßd. Nochm Griag gega de san fui Baia weida noch Osdn ins heidige Niedaäsdareich, Istrien und da Krain zogn. Weisa si mid de Ottonen zschdrin ham, sans wieda abhängiga vom deidschn Königsdum woan, so daas 976 si da südösdliche Teil obschboid und noch Keanddn gem woan is. Und a de Babenbeaga ham im Osdn oiwei unabhängiger vo de boarischn Heazög regiad. 1070 hod sis mid de Welfn wieda kuaz umdrahd, so daas de boarischn Heazög meahra Machd gkabd hom, wia da Staufa Kaisa Friedrich I. Barbarossa aba über de Welfn gwonna hod, is d'Steiamagg und Istrien obgschboidn woan.

Ab 1180 endlich ham de Wittlsbacha Baian bis 1918 regiad. In da easchdn Zeid san oba a Haufa gloane Heazgtüma endschdandn, bloß ois da Ludwig IV. Kaisa woan is wa Baian kuaz wiedavaeind. Ea was a, dea de Wittlsbacha in zwoa Linien aufteild hod, oamoi de Pfoiza Linie und oamoi de Oidboarische. D'Kuafüasdnwüadn ham de Oidbaian 1356 mid da Goidnan Bulle an de Pfoiza Linie valoan. 1503 wan olle Linien unda da Mingana Linie zamkema und drei Johr schbäda, 1506, hod as Primogeniturgsetz de dauandn Teilungen obgschafd.