Fernandel

De Uiquipedia

Fernand Joseph Désiré Contandin, conocíu como Fernandel, foi un actor francés, nacíu en Marsella'l 8 de mayu de 1903, y que morrió en París el 26 de febreru de 1971. Foi so suegra la que-y pusiera'l nomatu de Fernandel cuando dicía:Voilà le Fernand d'elle cuando falaba del so xenru y la so fía (aunque hai quien diz qu'esta versión ye apócrifa).

[editar] Biografía

Durante una decena d'años fizo trabayinos pa dir tirando, ente 1915 y 1925, entamando la so carrera profesional (en 1915 tenía 12 años). Paralelamente trabayaba como cantante cómicu nos café-conciertu, onde sosprendía pol so perfil de tiesta de caballu. El 4 d'abril de 1925 cásase con Henriette Manse, la hermana d'un inseparable compañeru. Tendrán tres fíos, Josette en 1926, Janine en 1930 y Franck en 1935.

Entamó a trabayar nel cine nel añu 1931, interpretando'l papel d'un botones na película Le Blanc et le noir. Esi mesmu añu Jean Renoir da-y un papel más importante en On purge bébé. Tamién en 1931 ye'l mocín de la película de Bernard Deschamps Le Rosier de Madame Husson, nel qu'interpretará un papel d'un mozu tontu que pierde la so virxinidá nun burdel. Darréu los sos triunfos multiplíquense, aunque él nun escaez la so profesión de cantante participando en numberosos musicales.

Los años cuarenta nun fueron especialmente granibles pa la so carrera, pero nos cincuenta too cambia gracies a Julien Duvivier y a la serie Don Camilo na que un cura y un alcalde comunista llibren una llucha d'influencia nun pueblín d'Italia: Le Petit monde de Don Camillo (1951), Le Retour de Don Camillo (1953). Depués fueron otros realizadores los que lu dirixeron nel papel de D. Camilo, la Grande bagarre de Don Camillo (1955), Don Camillo Monseigneur (1961), y Don Camillo et les contestataires, película qu'entama a rodar en 1970, pero que nun podrá acabar,víctima d'un cáncer. Funda con Jean Gabin la productora Gafer en 1963.

Fernandel tuvo grandes ésitos coles grabaciones de testos de delles de les Lettres de mon moulin d'Alphonse Daudet. Fernandel tamién foi realizador de delles películes: Simplet en 1942 Adrien 1943 y Adhémar ou le jouet de la fatalité en 1951.

En tou esti tiempu fizo unes cien películes, siendo unu de los cómicos más famosos de Francia.