El Wendigo
De Uiquipedia
El Wendigo ye una revista de crítica de cómic que s'edita en Xixón. Entamó a asoleyase nel añu 1974 de la mano de dos estudiantes: Ramón Fermín Pérez Meana y Ignacio de Loyola Sánchez Vicente.
El númberu cero taba formáu por nueve folios fotocopiaos que se vendíen al preciu de 30 pesetes. Posteriormente fueron amestándose más firmes d'otros aficionaos al cómic asturianos. Destaca la incorporación nos primeros númberos de Faustino Rodríguez Arbesú que la sigue dirixendo anguaño y que ye unu de los más prestixosos críticos de cómic d'España.
La revista, no tocante a los conteníos, pasó por varies etapes, alternando crítica y sofitu a los creadores más mozos del panorama tebeísticu asturianu.
Otra de les característiques que presenta El Wendigo ye la so portada fecha, polo xeneral, a partir d'un dibuxu orixinal fechu por dalgunu de los artistes que participen nel Salón Internacional del Cómic del Principáu d'Asturies, que la propia revista entama en Xixón tolos años.
A partir del númberu 76, El Wendigo entamó a asoleyar, de la mano de Faustino Rodríguez Arbesú, La Historieta Asturiana que fai un repasu dafechu al mundu del cómic nel Principáu a lo llargo del Sieglu XX.
A pesar de les dificultaes económiques coles que tien qu'arrecostinar, El Wendigo sigue editándose tovía güei, pasando yá de los cien númberos. Igualmente los conteníos de la revista puen consultase na so páxina web, que cuenta con un archivo colos artículos de númberos anteriores.
Anguaño, arriendes de los trabayos del director de la revista, rescamplen los artículos de Florentino Flórez nos que s'analicen les novedaes editoriales o sobre'l llinguaxe del cómic.
