Cavelier de La Salle
De Uiquipedia
René-Robert Cavelier de La Salle (1643 - 1687) foi un esplorador francés, que tomó posesión de la Lluisiana en nome del rei Lluis XIV de Francia.
René-Robert Cavalier nació'n Ruan (Normandía) el 21 de payares de 1643. Ellí estudió colos xesuites, antes d'entrar como noviciu na ciudá de París, onde pronunció los primeros votos en 1660.
Durante cinco años dedicose a la enseñanza, pero en 1667 renunció a los votos y embarcó pa Nueva Francia. Ellí recibió la propiedá de delles tierres cerca de Montreal.
En 1669, col apoyu del Conde de Frontenac, gobernador de Nueva Francia, financió una espedición,cola que pretendía aportar a la Mar Bermeya (l'Océanu Pacíficu ), siguiendo'l ríu Ohio. Nesta espedición esploró los llagos Ontario y Erie y fundó Fort Frontenac (anguaño Kingston).
Tres d'un viaxe a Francia en 1674 y 1675, nel que recibió'l títulu nobiliariu de Señor de La Salle, el rei autorizolu a esplorar territorios nuevos y construyir fuertes p'asegurar el so control.
En 1680 aportó al llagu Michigan y ente 1681 y 1682 baxó siguiendo'l Mississippi hasta'l Golfu de México. Cavalier de La Salle tomó posesión d'esos territorios en nome de Francia y dio-yos el nome de Lluisiana (Louisiane) n'honor del rei Lluis XIV de Francia.
En 1684 emprendió dende Francia, col títulu de Gobernador de la Lluisiana, un viaxe cola misión d'establecer un fuerte na desembocadura del Mississippi. Cuando llegó al Golfu de México desembarcó por erru nel actual territoriu de Texes. Los ataques de los indios, les enfermedaes, la falta d'agua potable y de víveres llevaron al fracasu de la espedición.
En xineru de 1687, con un grupu de 17 homes trató de llegar a Canadá, buscando ayuda pa los miembros que quedaben de la espedición. El 19 de marzu de 1687 los sos homes amotináronse y morrió d'un tiru na cabeza. Los supervivientes acabaron matándose ente ellos.
