Fernando Escartín

De Biquipedia

Fernando Escartín Coti (Biescas (Uesca), 24 de chinero de 1968), ziclista aragonés.

En os suyos onze años como profesional estió en tres equipes, o Clas-Cajastur, que más tardi cambeó o suyo nombre á Mapei, o Kelme-Costa Blanca, an estió lo chefe de filas y an abió los suyos grans esitos como corredor profesional, y o Coast, o suyo zaguer equipe dica la suya retirada. En os suyos empezipiallo como corredor estió gregario de Tony Rominger en o Clas-Cajastur.

Fernando Escartín, yera ziclista puramén escalador (1,75 m y 61 kg), se puede dizir que tot lo que ganaba en montaña o perdeba en contrarreloch ya que no estió un gran contrarrelochista anque amilloró positibamén en as zagueras añadas d'a suya carrera esportiba consiguiendo resultatos más que adempribiables.

Os suyos mayors trunfos como ziclista profesional estioron en a temporada de 1999 en cuala consiguió dos d'os suyos prenzipals ochetibos: estar en o podio d'a carrera más importán d'o mundo, o Tour de Franzia, y ganar a etapa reina d'a carrera franzesa d'ixa mesma añada con final en a estazión d'eslisadera de Piau Engaly. Antimás, estió a suya primera bitoria d'etapa en una carrera de tres semanas.

Tamén bi ha que destacar que en a Buelta á España logró dos segundos puestos (1997 y 1998) y salía como un d'os faboritos en la edizión d'o 1999. Una disgraziata caíta baxando lo Puerto d'o Cordal baxo una intensa plebia li obligó á albandonar en ixa edizión.

Como trunfos totals logró a cheneral d'a Buelta á las Bals Mineras en 1995 y a Volta á Cataluña de 1998. Como trunfos parzials ha lograto etapas en a Buelta á Galizia, Buelta á Aragón, Buelta á los Puertos, Buelta á Asturias y en o Tour de Franzia.