Bal d'Ordesa
De Biquipedia
A Bal d'Ordesa ye a bal que orichinó a creyazión d'o Parque nazional d'Ordesa y Mon Perdiu o 16 d'agosto de 1918 chunto con o mazizo d'as Tres Serols, estando dimpués enamplato á la Bal d'Añisclo, os Congostos d'Escuaín y a cabezera d'a Bal de Pineta.
A Bal d'Ordesa encluye una ampla redolda de bal, altiplans y tucas (muitas de más de 3000 m d'altaria), cualas mugas serban á lo norte a cresta Mon Perdiu-Mondarruego, que sirbe de muga con Franzia en gran parti, á lo sur la cresta Mon Perdiu-Acuta y á l'ueste a confluyenzia con a Bal de l'Ara. Tot iste conchunto forma una compleganza flubial, que á trabiés de bal secundarias y saltos d'augua, desemboca en a Bal d'Ordesa, por cuala descurre o río Arazas.
[Editar] Zonas altas
En as zonas altas destaca una parti d'a cresta Norte, dende o Mon Perdiu (3355 m) dica os Cabietos (3034 m), toda una suzesión de tucas de más de 3000 m y en a que s'ubre una gran crepa, la Breca de Rolando, paso "natural" entre Franzia y España y que seguntes a falordia estió ubierta por un trucazo d'a espada de Rolando. Una mica más ta o sur d'a Breca se troba a Espelunga de Casteret, cualo interior ye en gran parti chelato, con colunnas y cadreitas de chelo.
A bersán norte ba deszendiendo en una suzesión de circos y bals glazials, con alticamans saltos d'augua, entre os que destaca o Zirco y cadreita de Cotatuero, en cuala cursa se i troban as famosas clabillas de Cotatuero, unas simplas barras metalicas fincatas en una paret bertical de paso obligato y no aptas ta presonas con bertigo.
[Editar] Zonas baxas
A Bal d'Ordesa ye una bal glazial, con forma de "U", situata á lo surueste d'as Tres Serols, por a cuala desziende o río Arazas formando bellas cadreitas. Dende a que prenzipia la bal, en o Zirco de Soaso, conoxida como a Coda de Caballo y que pasa por as Gradas de Soaso, una suzesión de moltiples cadreitas escaleronatas, dica os saltos d'augua d'o Estreito y a Espelunga.
