Ymir
Us der alemannische Wikipedia, der freie Dialäkt-Enzyklopedy
 |
Dialäkt: nördl. Markgräflerisch |
Ymir (altnordisch, Zwilling, Zwitter), identisch mit Aurgelmir, isch in de nordische Mythologi s'äldist Läbewese.
Er isch ä zwaigschlechtlicher Urzittriis mit sechs Chöpf gsi. Er isch entstande us de Vermischig vum Gletscheriis vu Niflheim un us em Fir vu Muspelheim. Er het sich vu de Milch vu de Urchueh Audhumla ernährt.
Wie er vu de Milch vu de Urchueh trunke gha het, isch er igschlofe. Debi het er nit gmerkt, dass näbe ihm s'Schwert vum Firriis Surtr igschlage isch. Wil säll sehr haiß gsi isch, isch us sinem Schwaiß Thrudgelmir, ä sexchöpfige Riis, entstande.
Die erste Götter, Odin, Ve un Vili hän ihn umbrocht un us sine Körperdaile d'Welt baut: Us sinem Flaisch isch d'Erde gworre, us em Bluet s'Meer, us de Zähn Stai un Felse, us sinem Hoor d'Baim, us sine Augenbraue Midgard un us sinem Schädel de Himmel. Die vir Eckpunkt vum Himmel werre debi vu de Zwerge Nordi, Sudri, Austri un Westri gstützt.
Lueg au: Germanischi Schöpfigsgschichte; Ymir (Mond)
