Lausanne Sport
Us der alemannische Wikipedia, der freie Dialäkt-Enzyklopedy
Dr FC Lausanne-Sport isch e Schwyzer Fuessballclub vo Lausanne, im Hauptort vom Kanton Waadt. Er issch dr Nachfolgeverein vo Lausanne Sports, wo 2003 Konkurs het müesse amälde. Dr Vorgänger isch sportlich nie abgstige, und sim Nachfolger ischs bis jetz immer glunge, i jedere Saison ufzstige: vo dr 2. Liga interregional i die 1. Liga und vo dr 1. Liga i d'Challenge League, wo dr FC Lausanne-Sport momentan (15. April 2006) Dritte i dr Tabälle isch.
Usserdäm spielt zurzyt dr erfolgrichst Schwyzer Fuessballer, wo's je ge het, Stéphane Chapuisat, widr bi Lausanne. Er het sini Karriere bi Lausanne Sport lanciert und spannt jetzt wunderschön e Boge über sini einzigartigi Karriere.
Lausanne Sports isch siebefache Schwyzer Meister und nünfache Cupsieger. Er spielt im Stade Olympique de la Pontaise, wo öppe 17'000 Lüt drin Platz finde und glichzytig ischs au no Austragigsort vom jöhrlich stattfindende Liechtathletik-Event.
D'Vereinsfarbe vo Lausanne si Blau-Wiss. Dr letscht gross Erfolg (näbe de Ufstig natürlich) isch die dreimaligi ufenanderfolgendi Teilnahm am Schwyzer Cupfinal 1998, 1999 und 2000. 1998 isch dr FC St. Galle besigt worde, 1999 dr Grasshopper-Club vo Züri. Bi dr letschte Teilnahm isch me aber im FC Züri im Penaltyschiesse unterläge.