Hugo Pratt

Us der alemannische Wikipedia, der freie Dialäkt-Enzyklopedy

Dr Hugo Pratt (15. Juni 1927 - 1995) isch en italiänische Comic-Zaichner und -Täggschter gsi. Sy beriemtischti Figur isch dr Corto Maltese. Am Hugo Pratt sy Zaichnigsschtil isch vo amerikanische Maischter wi em Milton Caniff beyflusst worde; är hed aber scho bald zu sym ganz aigetümlige Duktus gfunde. Är isch bekannt worde für syni poetische Obetüür-Comics.

Är isch in Rimini gebore. Sy Vatter isch e brofessionelle Soldaat gsi und im Joor 1937 isch är mit synere Familie noch Etiopie zoge. 1941 isch sy Vatter im Kampf gege britischi Druppe ums Läbe koo. Dr Hugo Pratt isch interniert worde und hed vo de Wächter Comics kauft.

Är isch in ere Gruppe vo Zaichner und Täggschter gsi zäme mit em Alberto Ongaro und em Mario Faustinelli. Ir Magazyn Asso di Picche isch ab 1945 erschine.

1949 isch dr Hugo Pratt uf Buenos Aires zoge, won er für dr argentinischi Verlag Editorial Abril gschafft hed. Är hed au südamerikanischi Comic-Künschtler wi dr José Luis Salinas und dr Solano López kennegleert. 1962 isch är zrugg noch Italie; 1964 isch är uf Grôssbritannie zoge, won er für dr Daily Mirror und d War Picture Library/Sunday Pictorial gschafft hed. 1965 hed är - wider in Italie - für dr Corriere dei Piccoli zaichnet. 1967 isch s erschti Obetüür mit em Corto Maltese erschine, und zwor zersch im neue Magazîn Sgt. Kirk, denn au im französische Heftli Pif. Schliesslig hed sich dr Verlaag Casterman aagfange, syni Comics z veröffentlige und so isch dr Pratt immer erfolgyrcher worde, vor allem in Franggrych. Är hed unter anderem mit em Milo Manara zämgeschafft und e Comic über di letschte Dääg vom Antoine Saint-Exupéry kreiert.