Gattung (Biologie)

Us der alemannische Wikipedia, der freie Dialäkt-Enzyklopedy

Der Artikel bschäftigt sich mitem Gattigsbegriff us de biologische Taxonomi. Witeri Bdütige vu Gattig findener under Gattig

Dialäkt: nördl. Markgräflerisch

D' Gattig (lat. Genus) isch ä hierarchischi Stufe (Taxon) vu de biologische Systematik

Ä Gattig enthaltet aini oder mehreri Arte. Ä Bispiil vu ere Gattig isch d' Abies (Danne). Alli Arte innerhalb vu ere Gattig hän immer ä zwaidailige (binominale) Namme, wo näbe de Gattigsbzaichnig noch ä Art-Epipheton enthaltet. Abies alba (d'Wissdanne) isch ä Art in de Gattung Abies (Danne). Sälli durgohend binominal Bnennig goht uf Carl von Linné zruck, wo si in sinem Werch Systema Naturae igfeehrt het.

Wenn ä Gattig bloß ai Art enthaltet, nennt mer d'Gattig monotypisch. Gattige selber werre in Familie zsämmegfasst.

[ändere] Struktureerig vu ere Gattig

Wenn ä Gattig vili Arte enthaltet, wo noch underschidliche Kriterie gordnet werre chänne, sten die folgende hierarchische Räng zuer Verfüegig:

• Undergattig
• Sektion
• Undersektion
• Serie
• Underserie

Debi isch es im Ermesse vum Biologe, weller vu de Räng agmesse erschiint. Bdütendi Underschid werre in de Regel dur Undergattige usdruggt; bi uschinbare Variatione wird echer d'Sektion bnutzt. S'git also chai Vorschrift, dass bstimmti Räng bvorzugt z'bnutze sin. Allerdings wird d'Undersektion (bzw. Underserie) bloß bruucht, wenn au d'Sektion (bzw. Serie) bnutzt wird.