Badische Zeitung

Us der alemannische Wikipedia, der freie Dialäkt-Enzyklopedy

Dr Artikel Badische Zeitung isch für d'bsunders glungeni Artikel vorgschlage worre. E Wikipedianer meint, dass dä Artikel e bsunders gueti Arbet isch un mer ne cha empfehle.
Du chasch dyni Meinig dezue uf dr Kandidate Syte kundgä un abstimme.

Vor eme Friiburger Zittigsgschäft

D Badisch Zittig isch 1946 z Friiburg im Briisgau gründet worde. Die Regionalzittig isch siterher in Familiebsitz. Anno 1950 isch d Freiburger Zeitung in d Badisch integriert worde - die isch scho im 19. Johrhundert gründet worde un het 1943 müeße stillglegt werde. D Badischi erschiint hüt (2005) mit 21 Regionalusgabe un erreicht ca. 400.000 Läser (Uflag 157.000). Die Usgabe hän de überregionali Teil gmeinsam - er het d Theme Politik, Wirtschaft, Aus Land und Region, Sport un anderi. De Lokalteil isch natürlich überall bsonders, de gröschti het Friiburg, er nännt sich "Freiburger Zeitung".

[ändere] Verbreitig 2005

Ihre Verbreitig isch im Süde un Weschte vom Rhii begränzt, im Oschte un Norde goht si bis zum e Umkreis vo Waldshuet, Bonndorf, Donaueschinge, Furtwange, Waldkirch un Offeburg. In däne Randgebiit het si Konkurränz vo andere Regionalzittige. Des sin vo Süd noch Nord s Oberbadischi Volchsblatt, de Südkurrier, de Schwarzwälder Bott, d Lohrer Zittig, s Offeburger Tagblatt un chliineri anderi.
Im Großraum Friiburg (Friiburg, Mülle, Briisach, Emmedinge) het d BZ e Monopolstellig. Do het si Konkurränz numme durch wöchentlich koschtelos verteilti Werbeblätter (zum Teil mit redaktionällem Teil zu regionale, sältener iberregionale Theme). D verkauft Uflag isch (noch ere BZ-Azeig vom 10. 2. 2001) "in Freiburg und Umgebung" 64.317 für d BZ, 3.227 für d FAZ, 2.027 für d Süddütsch Zittig un 818 für d taz.
Uf em Azeigemärkt kooperiert d Badischi Zittig mit de Basler Zittig un mit de L'Alsace.

[ändere] Politischi Usrichtig un Widerständ

Im e so gnannte "Grundgesetz der Badischen" heißts: "Verleger und Redaktion stellen sich nicht einseitig in den Dienst politischer, konfessioneller, wirtschaftlicher oder anderer Gruppen und Einzelinteressen." (BZ-Extrablatt 9. 10. 98) Aber e links-liberali Grundtendenz isch bi de meischte (nüt alle) Redaktör un Korrespondente, wo zum Zug chömme, nüt zum übersäh. Des wird bsonders im Großraum Friiburg, wo d Badischi e Monopolstellig het, vo mänke Läser bitter empfunde. Traditionelli Verein füehle sich gegenüber bstimmte politische Initiative in der Berichterstattig benochteiligt. In de Gegende, wo d BZ chei Monopolstellig het, chaufe sich die, wo sich vo de Badische nüt guet verträtte füehle, eifach e anders Regionalblatt.
S Meinigsmonopol vo däre Zittig wird relativiert durs Forum, des isch d Läserbriefsitte, wo alli Dag e halbi Sitte, bi bsondere Aläss aber au e ganzi oder meh Sitte umfasst. Au d Lokalteil hän ab un zue oder immer Läserbiefspalte. Eso e Alass isch im April 2000 gsii, do isch d BZ mit Läserbrief bombardiert worde, wel si e diffamierende Artikel über de Altkanzler Kohl brocht heig. Im Mai 2001 hän sich viili Müetere dur de Artikel "Sind Mütter die besseren Menschen?" verletzt gfüehlt un sich in viile Läserbrief gwehrt. Allerdings dominiere au im Forum viilmol linki Meinige, wel des dur s Läser- un Schriiber-Publikum im Raum vo de Universitätsstadt Friiburg so chömmt, während uf em Land hüffiger konservativi Mänsche läbe, wo nit so gärn zu de Fädere griffe.
D universitäts-städtischi Läserschaft weißt sich z wehre. So het si 1997 in ere Unterschrifte-Kampagne d Entlassig vom Kulturredaktör Gerhard Jörder verhinderet. Mer het befürchtet, dass d BZ im Kulturteil meh uf Unterhaltigsjounalismus mache will. Hunderti Professore un Doktere hän do in große Azeige in dr BZ Front gege si Entlassig gmacht un hän sich durchgsetzt.

[ändere] Kolumne Lueginsland

Siter 1976 het d Badischi Zittig alli zwee Samschtig e alemannischi Spalte gha - des isch im Zug vo de Wiiderbeläbig vom Dialäkt in de ökologische Bewegige cho. 1997 hätt die Kolumne sotte abgschafft werde. Do hän sich alemannischi Läser in ere Azeige-Kampagne mit ca. 200 Unterschrifte gwehrt - do sin au namhafti Persönlichkeite us Politik un Kultur drunter gsii. Siterher wird die alemannischi Spalte unterem Namme Lueginsland alli Wuche am Samschtig witergfüehrt. Si erschiint im Teil Aus Land und Region un het meischtens regionali Theme oder bringt Gschichte us em Läbe un Umfeld vo de Autore. In de Usgab vum 12.11.2005 het de Kolumnist vu dere Rubrik vu de Badische Zittig de Alemannische Wikipedia zum 2. Burtsdag am 13.11. gratuleert und debi de Chlämens us Rhiifelde, d/de Melancholie un de J.'mach'wust lobend erwähnt.

[ändere] Journalischtischi Qualität

D journalischischi Qualität vo de BZ isch überregional anerchannt, si het für des scho verschiidini Priis übercho. Si wird in dr Presseschaue vo große Rundfunkastalte gärn zitiert. De ehemalig FDP-Politiker un s jetzig Mitgliid vom britische Oberhuus, de Lord Ralf Dahrendorf, isch offizielle Beroter vo de Badische Zittig.