Ауаҩы Лаша

Материал из Wikipedia.

Ҭеиҭҧшла деинаалан, гәаҭала дыҧшӡан,
Даамысҭашәан, иажәа ҟәышын, ираӡан.
Ажәытәтәи аҩырақәа асаба рхых,
Адунеи аҵахьтә иҭиҵаауан ҳҭоурых,
Ҧсыхәак аҭан аиаша иҳәон,
Ҿымҭ-ҧсымшьа иус ҟаиҵон.

Ҳзықәшәаз хьааигон, ихатәгәырҩеиҧш,
Гәҭыхас иман ҧхьаҟа ҳҧеиҧш...
Дзыхьӡаз ҟәнаҳшьом - ирацәоуп.
Дызхьымӡаз мцаха иҳацроуп!

Иҳамчгәышьои - бзиала ҳҳәароуп,
Агәырҩа иҳаиҭаз ҳанышәароуп.
Иара дзыҧсахша ирызҳароуп,-
Иҭыҧ ҭацәны иаанымхароуп.
Ҳҭоурых меихсыҕьуа иҿиалароуп.
Ихьӡ меицакуа иаццалароуп...

Даамысҭашәан. Дуаҩылашан.Деиҿкаан.
Дызхылҵыз иҧсадгьыл еиҧш дыҧшӡан.
Цәала-жьыла дцазаргьы дымҩас,
Дхааӡа дҳалаҧхоит мраҵас.

Даднакылахьеит Ахраҭ,
Агәашәқәа изаатхьеит џьанаҭ.
Жәларык аҵеицәа иҳацәҭахаз,
Уаҟа иҧылеит ҭынхаҵас.-
Ҳа ҳазҽеихар ожәшьҭа арахь,
Рыҧсқәа ҭынчхоит урҭгьы уахь...

Витали Амаршьан