Волга-Урал регион

Материал из Wikipedia.

Во́лга-Урал регион (Ура́ло-Пово́лжье) — Россилэн гуманитарной географиысьтыз валатон. Наукаын но культура удысын ужасьёс озьы ӵемысь шуо Россилэсь оглюкетсэ, кудаз пыро Волга но Кам доры, Урал гурезьёс азе интыяськем Россия Федерациысь субъектъёс. Соос пӧлы ӵемгес пырто Удмуртиез, Татариез, Башкириез, Чувашиез, Марий Элэз, Мордовиез, Киров улосэз но куд-ог бускель улосъёсты.

Волга-Урал регион туж висъяське, кылсярысь, Центральной Россиялэсь география ласянь но, культура ласянь но. Та регионлэн тодметъёсыз пӧлы таӵеоссэ пыртыны луысал: калыкъёс но кылъёс, культураос но религиос ласянь троспӧртэмлык но тупаса улон, Мусколэсь кыдёкынгес улон но огвакытэ ик Россилэн европейской люкетаз, Европалэн культурно-семантической бусыяз интыяськон.

Волга-Уралысь калыкъёслэн духовной культураосазы (кылсярысь, мифологиын, этнографиын, музыкаын, литератураын) туж уно огъя интыос вань. Отысь калыкъёслэн кылъёс куспазы кемаласен ини люконтэм герӟет кылдэмын (куд-ог учёнойёс, кылсярысь, Габор Берецки но Евгений Хелимский, таӵе югдурез лыдэ басьтыса, Волга-Уралысь кылъёслэн союззы сярысь выль валатон юнматыны туртто).