Аристе, Пауль Александрович
Материал из Wikipedia.
Па́уль [Алекса́ндрович] А́ристе (ӵемысь солэсь нимтулзэ Аристэ шуыса гожъяло но) – туж тодмо эстон кылчи, полиглот, Тарту университетысь профессор, академик. Вордскемын 1905 аре 3 феврале Россиын, Эстляндия губерняысь Тартумаа утемысь Ряэбиза нимо мызаын, дуриськисьлэн семьяяз. Аслэсьтыз азьвыл фамилизэ – Берг – со воштӥз 1927 аре (со вие уноез эстонъёс асьсэлэсь немец тусо нимтулъёссэс куштыло вылэм но эстон тусо кылъёслэсь пӧрмытэм выль нимтулъёссэс асьсэлы басьтыло вылэм). 1916 аре Пауль семьяеныз Таллинэ выже. Отын со кутскон школаез но пимурт гимназиез йылпумъяз. Дышесткемын Тарту университетын. Пауль Аристелэн наука ласянь кивалтӥсез вал тодмо эстон кылчи Петер Арумаа. 1931 аре Аристе магистрлэсь степеньзэ басьтэ (магистр луон дисертациез «Эстон-швед асэстэмъёс эстон кылын» шуыса нимаське вал), 1939 аре нош, Хийумааысь говоръёслэн фонетиказылы сӥзем диссертацизэ утьыса, филологияя докторлэсь степеньзэ басьтӥз.
Пауль Аристе Финн-угор научной обществолэн, Финляндиысь но Венгриысь наукаосъя академиослэн сӥё-дано члензы, Эстон ССР-ысь наукаосъя академилэн зэмос членэз вал (1954 арысен). Аристелэн кичӧлтэмезъя Таллинын усьтэмын вал «Советское финно-угроведение» нимо научной журнал. Ачиз Аристе со журналын улонэзлэн пумозяз ик валтӥсь редактор луыса ужаз.
Аристелэн наука удысысь ужъёсыз эстон кылэз эскеронлы (кылсярысь, эстон кыллэн исторической но экспериментальной фонетикаезлы) но огъя финн-угор кылтодонлы сӥземын вал, озьы ке но, со саклык висъялляз водь, лив но ижора кылъёслы.
Ӵапак Аристелэн ӵектэмезъя Россиысь финн-угор калыкъёс пӧлысь потэм егит кылчиосты Тарту университетэ целевой аспирантурае ыстыны кутскиллям. Пӧртэм вакытъёсы Тарту университетын дышетскизы яке асьсэлэсь диссертациоссэс утизы тодмоесь удмурт кылчиос но литературоведъёс: Иван Тараканов, Татьяна Владыкина, Георгий Архипов, Михаил Атаманов, Бибинур Загуляева, Валентина Калашникова, Серафим Соколов, Риф Насибуллин, Даниил Яшин но Роза Яшина, Людмила Карпова.
Аристе тросэз адямиосты паймытъяз аслаз полиглот (уно кылъёсты тодӥсь) луэменыз. Аристе ог ньыльдон кылъёс тодэ вал, шуо; соос пӧлын – вашкала еврей кыл, эсперанто, швед но латви кыл, цыган кыл но трос мукет кылъёс.
Пауль Аристэ кулӥз 1990 аре, 2 феврале.
