Églyise d'Angliétèrre
From Wikipedia
Ch't' articl'ye fut c'menchie en Jèrriais
![]() |
![La Cathédrale dé St. Paul à Londres](../../../upload/shared/thumb/b/bb/City.of.london.st.pauls.arp.500pix.jpg/180px-City.of.london.st.pauls.arp.500pix.jpg)
L' Églyise d'Angliétèrre est l'églyise nâtionnale Anglyicanne dé l'Angliétèrre. Ch'est la r'ligion d'état en Angliétèrre, dans l's Îles d'la Manche et dans l'Île dé Man.
[amendaer] Histouaithe
La Chrêtchienn'té fut apportée en Grande Brétangne par les Romains. Auprès la tchête d'l'Empithe Romain et la r'traite des soudards Romains d'la provînche dé Brétangne (Britannia), ch'tait des mouaines Celtiques tchi gardaient la fouai duthant l'temps des Saxons et tout chenna.
Saint Aûdgustîn fut env'yé en Angliétèrre par lé Pape Grégouaithe lé Preunmyi (590-604) pour convèrti l's Angliais. I' trouvit d's églyises dêjà êtablyies dans des difféthentes contrées du pays. Lé Rouai Ethelbèrt donnit eune vielle églyise dêjà êtablyie à Cantorbéry. Il en fît san siège épiscopal et d'vînt l'preunmié Archêvêque dé Cantorbéry vèrs l'année 600.
L'îndépendance et les privilèges d'l'Églyise d'Angliétèrre fûdrent affirmés par lé Rouai Jean dans La Grande Charte à Runnymede en 1215. Avaû l's années y'avait du hèrtchîn entré l'rouai et l'églyise en Angliétèrre et l'pape à Rome.
Henri VIII d'Angliétèrre tchestchionnit la r'cliâme d'autorité ecclésiastique univèrselle dé Rome et l'parlément Angliais votit eune louai tchi nommit l'Rouai coumme lé chef dé l'églyise en Angliétèrre.
Ch'tait l'Pape Pie V tchi, en 1570, ayant pèrdu espéthance dé faithe l's Angliais lus soumettre, prononcit l'excommeunicâtion contre la Reine Lîzabé I d'Angliétèrre et l'Églyise d'Angliétèrre, et pouor la preunmié fais les fidèles fûdrent d'fendus d'hanter l'Églyise Anglyicanne.