Mikro-ikkenemie
Van Wikipedia
Mikro-ikkenemie is ein deilgebeed vaan de ikkenomiesje weitesjap. 't Geit zich hiej óm de ikkenomiesje betrèkkinge tusje luuj, bedrieve, en de euverheid. Dit in teigesjtelling tót de makro-ikkenemie, dae zich beizig hauwt mit de globale ikkenomiesje variabele zewie het nationaal perduk, de wèrkeloosheid, en de inflaasje.
In de mikro-ikkenemie weurt traditioneel oetgegange vaan twei soorte sjpeilers: consumente (luuj) en firma's (bedrieve). Vaan luuj numt me aon tót se ein of anger verzaomeling veurkeure hubbe veur sommig goojer euver angere; vaan bedrieve weurt aangenómme tót se gein veurkeure vaan zichzelf hubbe, maer d'rop oet zeen om de wins ('t versjèl tusje inkaome en oetgave) zwao groat meugelik te hauwte.
Oet dees principes weurt dan in de theorie vaan de mert ópgebauwd. In een ideaal mert is veur eeder good ummer ein pries, dae veur alle luuj en bedrieve geliek is, en 't weurt aangenómme tót bedrieve vriej zeen óm de mert op te komme en aaf te gaon. Anger theorieje bestaon veur neet-ideale gevalle, zewie wienjae gein nuuj bedrieve toegelaote zeen, of gojer neet wiejerverkoch kenne waere.
't Groat succes vaan de mikro-ikkenemie is de realisaasje tót een ongeorganiseerde mert vaan bedrieve en luuj dae zich gedraoge wiet zich zelf oetkump 't gedaon kriet tót een sosjaal optimale verdeiling vaan gojer besteit, wobie 't neet meugelik is emes baeter te loate waere zónger emes anges te benaodeile. 't Moot waal ummer begriepe waere tót dit resultaot aafhankelik is vaan aannaomes euver de effisjensje vaan de mert dae mesjiens neet ummer waor zeen.
