Ciencia

Na Galipedia, a wikipedia en galego.

A ciencia é o conxunto dos sistemas de coñecemento con obxecto e métodos de estudo determinados e baseados en leis obxectivas que se poden verificar.

Índice

1 Introdución
2 Estrutura do coñecemento científico
3 Influencia da Ciencia na Sociedade
- 3.1 Divulgación científica
- 3.2 Auxe moderno da pseudociencia
4 Ver tamén
5 Relacionados
6 Referencias e ligazóns externas

[editar] Introdución

A ciencia (do latín scientia, coñecemento) é un proceso de adquisición do coñecemento e a organización ordenada del unha vez logrado a través do proceso científico. A ciencia constitue un método sistemático de obtención de coñecemento sobre a natureza en todos os seus aspectos. O método usado denomínase método científico.

Parte dos descubrimentos científicos poden resultar moi contra a intuición, como a natureza atómica ou cuántica da materia. Moitas concepcións intuitivas da natureza foron transformadas a partir de descubrimentos científicos como a rotación da Terra arredor do Sol ou a teoría da evolución. A ciencia tamén pode entenderse como unha institución da que forman parte os científicos e que funciona de acordo con regulamentos explícitos ou implícitos. As academias. universidades, institutos de investigación, as revistas científicas e os Premios e recoñecementos acdémicos conformarían este aspecto sociolóxico da ciencia.

[editar] Estrutura do coñecemento científico

[editar] O método científico

Artigo principal: Método científico.

O método científico constitúe o estudo sistemático, controlado, empírico e crítico de proposicións hipotéticas sobre presuntas relacións entre varios fenómenos naturais. Son dous os pilares básicos do método científico. O primeiro deles é a reproducibilidade, é dicir, a capacidade de repetir un determinado experimento en calquer lugar e por calquer persoa. Este pilar usa para a súa práctica, esencialmente, a comunicación e publicidade dos resultados obtidos. O segundo pilar é a falsabilidade. É dicir, que toda proposición científica ten que ter a posibilidade de ser falsada. Isto implica que se poden deseñar experimentos que no caso de dar resultados distintos ós preditos negarían a hipótese posta a proba.

Na actualidade os resultados da investigación científica son publicados en revistas científicas especializadas tras críticas ou comentarios doutros expertos, correccións por parte dos autores e mesmo verificacións dos experimentos por outros equipos de investigación. Asemade, está comezando a ser usual que se publiquen na rede ó tempo que nas revistas científicas ou exclusivamente.

[editar] Filosofía da ciencia

Artigo principal: Filosofía da ciencia

A efectividade da ciencia como método para obter coñecemento constituíu un notable campo de estudo para a filosofía. A filosofía da ciencia intenta comprender a natureza do coñecemento científico e as súas implicacións éticas.

[editar] Disciplinas científicas

Un esquema de clasificación foi plantexado polo epistemólogo alemán Rudolf Carnap, o primeiro en dividir a ciencia en ciencias puras, ciencias aplicadas e ciencias sociais ou humanas.

Ciencias puras ou formais: Por contraposición ás ciencias aplicadas, son as que non teñen en conta a súa aplicación práctica. Utilizan a dedución como método de procura da verdade.

Ciencias aplicadas ou fácticas: Encadran as Ciencias Naturais que teñen por obxecto o estudo da natureza. Seguen o método científico.

Ciencias sociais ou Humanas: Son todas as ciencias, na súa acepción máis ampla, que se ocupan dos aspectos do home - cultura e sociedade- non estudados nas ciencias naturais. O método depende de cada disciplina particular.

[editar] Historia da ciencia

Artigos principais: Historia da ciencia | Revolución científica | Avances científicos recentes

A historia da ciencia dá conta do desenvolvemento humano, marcado polos sucesivos cambios de paradigmas sobre a natureza. A historia da ciencia está marcada polo contínuo refinamento do coñecemento adquirido e o desenvolvimento tecnolóxico acelerado dende a aparición do método científico na chamada revolución científica.

[editar] Influencia da Ciencia na Sociedade

Dado o carácter universal da ciencia, a súa influencia exténdese a todos os campos da Sociedade. Dende o desenvolvemento tecnolóxico ós modernos problemas de tipo xurídico relacionados con campos da medicina ou a xenética, por nomear algúns casos. Nembargantes, dende o mundo académico percíbese un alonxamento entre ciencia e sociedade. En ocasións, a investigación científica permite abordar temas de grande calado social como o Proxecto Xenoma Humano.

[editar] Divulgación científica

Artigo principal: Divulgación científica.

A divulgación científica pretende facer doado o coñecemento científico á sociedade máis aló do mundo puramente académico. A divulgación pode referirse ós descubrimentos científicos do momento como a determinación da masa do neutrino, de teorías ben establecidas como a teoría da evolución ou de campos enteiros do coñecemento científico. A divulgación científica é unha tarefa que levan a cabo escritores, científicos, museos e, de xeito ocasional, a través dos medios de comunicación.

Algúns científicos notables teñen contribuído especialmente á divulgación do coñecemento científico. Entre os máis coñecidos están Stephen Hawking, Carl Sagan, Richard Dawkins, Stephen Jay Gould, Martin Gardner e autores de ciencia ficción como Isaac Asimov. Outros científicos teñen realizado tarefas de divulgación tanto en libros divulgativos como en novelas de ciencia ficción, como Fred Hoyle. A maioría das axencias ou institutos científicos destacados en Estados Unidos teñen un departamento de divulgación (chamado Education and Outreach) pero non é unha cousa común noutras partes.

[editar] Auxe moderno da pseudociencia

Artigo principal: Pseudociencia.

En contra da ciencia formal e o método científico, as sociedades humanas teñen desenvolvido dende antigo un sistema de crenzas máxicas ou mítico. En ocasións chámaselles Ciencias ocultas ou alternativas: coñecementos e prácticas misteriosas que dende a antigüidade pretenden domeñar os secretos da natureza. Non seguen o método científico polo que non son recoñecidas como disciplinas científicas e son consideradas en xeral como pseudociencias. Entre as máis populares en Occidente está a astroloxía.