Afixo

Na Galipedia, a wikipedia en galego.

Os afixos son partículas que se antepoñen (prefixos) ou pospoñen (sufixos) aos elementos básicos das palabras para modificar o seu significado, ben gramatical (afixos flexivos), ben léxico (afixos derivativos). Estes permítennos aumentar o número de palabras cun esforzo mínimo.

Algúns autores reservan o termo afixo para os morfemas derivativos e utilizan o termo desinencia para referirse a tódolos morfemas flexivos.

Os afixos son morfemas que se usan no proceso de derivación para formar novas palabras a partir doutras primitivas e así arriquecer unha familia léxica concreta. Engádense sempre ao lexema ou raíz.

[editar] Clasificación dos afixos

• Prefixos: Van antepostos ás palabras; en galego, non poden alterar a súa categoría gramatical e só poden ser morfemas derivativos.

• Sufixos: Van pospostos ás palabras; poden en galego alterar a súa categoría gramatical e ser morfemas flexivos. Xa que logo, os sufixos da nosa lingua adóitanse clasificar segundo as categorías da palabra resultante (sufixo substantivo, adxectival, verbal, adverbial) e da base de afixación (sufixo denominal, deadxectival, deverbal). Algúns exemplos:

• • Sufixos substantivos: cruel-dade (deadxectival), levanta-amento (deverbal).
  • Sufixos adxectivais: goz-oso (denominal), cant-ante (deverbal).
  • Sufixos verbais: fort-ificar(denominal e deadxectival).
  • Sufixos adverbiais: soa-mente.

• Interfixos e infixos: O termo interfixo adóitase reservar para designar aqueles afixos carentes de significado que aparecen entre a base e o afixo nalgunhas palabras: rei-c-iño.

• Circunfixos - Os circunfixos ou morfos discontinuos son morfemas que se engaden á vez ao principio e ao final dunha palabra, mediante unha operación chamada parasíntese. Este é o caso da palabra aparcar: posto que en galego non existen o verbo parcar nin o substantivo aparque, habemos de supoñer que esta palabra se creou engadindo o circunfixo a-...-ar á palabra parque.