Deborah Kerr
El Vikipedio
Deborah KERR, origine: Deborah Jane KERR-TRIMMER (naskiĝis la 30-an de septembro, 1921 en Helensburgh, Skotlando) estas brita aktorino.
Deborah Kerr komencis sian karieron kiel dancistino. En la jaro 1939 ŝi unuafoje aperis sin kiel aktorino en teatro, kaj en 1941 ŝi ricevis rolon en la filmo Major Barbara (laŭ teatraĵo de George Bernard Shaw).
El ŝiaj unuaj roloj en Hollywood menciindas ekz. tiu de la juna kristanino Lygia en Quo vadis (laŭ romano de Henryk Sienkiewicz). Grandan famon ŝi akiris per la filmo From Here to Eternity: La longa, pasia kiso kun Burt Lancaster apud maraj ondoj estas konsiderata unu el la plej ravaj kis-scenoj en la historio de la kino.
Kune kun Yul Brynner ŝi aperis en la muzikfilmo The King and I. Granda defio por ŝi estis la rolo en Separate Tables.
Post la filmo The Arrangement (1969, reĝisoro: Elia Kazan) Deborah Kerr retiriĝis el la kinolaboroj. Ĝis 1981 ŝi ĉefe dediĉis sin al la teatra laboro.
En ŝia filmkariero Deborah Kerr ses-foje estis nomumita por la Oskaro. En 1993 Oskaro honorigis ŝian dumvivan laboron.
[redaktu] Listo de filmoj
- Major Barbara (Britio, 1941)
- Black Narcissus (Britio, 1947)
- Edward My Son (Britio, 1949)
- Quo vadis (Usono, 1951)
- From Here to Eternity (Usono, 1953)
- Julius Caesar (1953)
- The King and I (Usono, 1956)
- Heaven Knows, Mr. Allison (Usono, 1957)
- Separate Tables (Usono, 1958)
- Bonjour Tristesse (Usono, 1958)
- The Sundowners (Usono, 1960)
- Casino Royale (Britio, 1966)
- The Gipsy Moths (Usono, 1969)
- The Arrangement (Usono, 1969)
- A Song at Twilight (televida produktaĵo, 1981)
- Witness for the Prosecution (Usono, 1982)