Copenaguen

De Biquipedia

**Copenaguen**

Ubicazión d'a poblazión en Dinamarca
Nombre autoctono	København
Aria total	526 km²
Poblazión - Ziudá (2004) - Aria metropolitana - Densidá de poblazión	502.204 1.116.979 954/km² [total]
Amt (Redolada)	-
Comuna (Monezipio)	Copenaguen (København)
Zona oraria - en estiu	CET (UTC+1) CEST (UTC+2)
Latitú	55°43' N
Lonchitú	12°34' E
Alcaldesa	Ritt Bjerregaard

Copenaguen ye a ziudá prenzipal e más antiga d'o Reino de Dinamarca, e la capital d'o Estato danés. Ye debez o nombre d'a kommune (u monezipio) en a que se troba. Tamién un d'os amter u redoladas de Dinamarca se clama Redolada de Copenaguen (Københavns Amt), pero ni la ziudá ni o monezipio de Copenaguen fan parte d'ixa redolada.

Copenaguen ye a siede d'o Parlamento, d'o Gubierno e d'a Monarquía danesa, instituzions ubicatas en o zentro d'a ziudá.

[Editar] Nombre d'a ziudá

Puerto de Copenaguen

O nombre autoctono d'a capital danesa, København, prozede de l'antigo nombre Købmandshavn, que en danés sinifica "puerto de mercaders", o que da ideya d'a suya posizión estratechica en o mar Baltico.

O nombre d'a ziudá en a mayoría d'idiomas europeus deriba d'a denominazión alemana, Kopenhagen. Asinas, l'anglés Copenhagen, o español e franzés Copenhague, o catalán Copenhaguen, o italiano Copenaghen u lo portugués Copenhaga.

[Editar] Cheografía

Copenaguen se troba prenzipalmén en a costa oriental de l'isla de Zelandia u Sjælland, con una parte d'a ziudá sobre l'isla d'Amager. Enta l'Este, Copenaguen acara l'Øresund, o estreito de mar que desapara Dinamarca de Suezia, e que achunta lo Mar d'o Norte con o Baltico.

En a costa oposata, se troban as ziudaz suecas de Malmö e Landskrona.

O monezipio de Copenaguen ye, chunto con o de Frederiksberg e o de Bornholm, un d'os tres que no pertenexen á garra redolada de Dinamarca.

A ziudá de Copenaguen se trestalla en 15 destritos clamatos bydele.

Copenaguen fa tamién parte d'a conoxita como rechión de l'Øresund, que abraca tota la parte oriental d'o Sjælland, en Dinamarca, e la parte ozidental de Escania, en Suezia.

[Editar] Poblazión

Nyhavn, Copenaguen

L'aria metropolitana de Copenaguen, o Storkøbenhavn, conta con 1.116.979 d'abitadors. D'éls, 502.204 residen en o monezipio de Copenaguen, 91.721 en o monezipio de Frederiksberg, 68.704 en o monezipio de Gentofte e 454.350 en belaltros monezipios amanatos.

A rechión de l'Øresund conta, en chunto, con 2.800.000 d'abitadors.

[Editar] Istoria

Copenaguen fue fundata probablemén ta l'año 1000 per Svend I e lo fillo suyo, Canut O Gran. Estió sólo que un lugar de pescataires dica la metá d'o sieglo XII, cuan se tornó más importán en prener-ne posesión o bispe Absalón, que la fortificó en 1167. O sobrebuen puerto aduyó ta o creximiento de Copenaguen, fendo-ne un gran zentro de comerzio en o norte d'Europa, o que daría o nombre á la ziudá. Ixo tamién contrebuyó á continos ataques per parte d'a Hansa u Liga Anseatica.

De l'año 1658 á lo 1659, fue sitiata per os suecos en o reinato de Carlos X. En 1801, os barcos britanicos de l'almirán Parker combatioron contra la marina danesa en o puerto de Copenaguen en a que se conox como Batalla de Copenaguen. En 1807, a ziudá sofrió grans daños e zentenars de personas morioron en estar Copenaguen bombardeyata con codetes Congreve per parte d'os britanicos á fin que Dinamarca no reblase debán d'a flota de Napolión.

En a Segunda Guerra Mundial, Copenaguen e Dinamarca entera fueron ocupatas per tropas alemanas entre lo 9 d'abril de 1940 dica lo 4 de mayo de 1945. De l'inte que remató la guerra, a ziudá no ha dixato de crexer.

Dende lo berano de 2000, as ziudaz de Copenaguen e Malmö son comunicatas per un puen de peita, o Puen de l'Øresund, que premite de cruzar de Dinamarca ta Suezia igual per carretera como per ferrocarril. Fue enguerato en chulio de 2000 per o rei Carlos XVI Gustau de Suezia e a reina Margarita II de Dinamarca. En consecuenzia, Copenaguen se ye tornata lo zentro d'un aria metropolitana que abraca las dos nazions.