Nervyins
Èn årtike di Wikipedia.
Les Nervyins (Nervii e latén) fourît ene des pus poûxhantès tribus del Confederåcion Beldjike ki viként å Levant di l' Aiwe d' Escô dins l' mîtrinne Belgae do tins des Romins. Li date egzake di leu distrujhaedje n' est nén cnoxhowe. Il estént veyous come les pus waeraxhes des tribus beldjikes. Li Belgae esteut metou a pô près dins çou k' est asteure li Beldjike.
Leu tuzance esteut foirt sparciåte; il avént tchoezi di n' nén boere des alcolijheyès abwessons nerén des ôtès sfwaits plaijhis, ca i pinsèt k' leu esprit dveut tofer dimaner clair po-z esse coraedjeus. Les scrijhaedjes ki nos avans rapoirtèt k' i n' avént nole classe di martchands ou vindeus, çou ki fwait acroere k' i n' avént pont d' manoye eyet k' il estént motoit nén foirt ritches ou avancîs.
Aidîs dås Atrebates eyet Viromandui et co d' bråmint ds ôtès tribus djermanikes, il ont cåzu batou Djule Cezår e -57. Les Adouwatikes (Atuatuci), ene ôte tribu, estént en erote po les radjonde mins i n' arivît nén a tins pol batreye, çou ki provoca leu disfwaite. Après cisse batreye la, li plupårt des tribus del Belgae s' ont rindou, mins nén les Nervyins, et n' ont nén accepté les ambassadeus nerén l' påye di Rome; il ont continouwé a-z ataker les covoyes romins. Cezår adjinçna-st on plan tnant contedo fwait ki les Nervyins n' avént pont d' cavalreye, çou k' apårumint reyussixha. Après leu decimaedjes pås Romins il ont dmandé po èn årmistice. Les scrijhaedjes rapoirtèt kel situwåcion esteut téle ki leu-z årmêye di 60.000 n' esteut pus k' di 500, eyet leus 600 moenneus n' estént pus k' 3. Apårumint Cezår lezî dna l' påye k' i dmandént, eyet djha a leus vjhéns di n' pont ls ataker.
I shonne kel mwaisse-veye des Nervyins fouxhixhe Bagacum (Bavai).
Totes les cnoxhowès dnêyes vnént do scrijhaedje “Li Guere des Gåles” pa Djule Cezår; cåze di çoula i s' pout bén ki sacwantès sacwès soeyexhe ene miete candjeyes po favorijhî l' pont d' vuwe da Cezår; mins nerén li båze di l'&nbps;istwere pout esse contêye come des fwaits solides.
