Jean-Marie Dedecker

From Wikipedia

Dit artikel moe erschreevn worden in't Ostends.

Jean-Marie Dedecker (Nieuwpôort, 13 juni 1952) et eigelik twêe leevns g'hed: êen as coach va Belgjes mêest succesriekste judoka's (o.a. Gella Vandecaveye en Ulla Werbrouck) en êen as polletieker. J' is geboorn in Niepoort, mor nu komt en up as polletieker in Ostende.

[bewerk'n] Judocoach

In de jaren '80 en '90 was 'n de bezieler va de Belgische judo: de mêest bekende vanuut West-Vlams standpunt zien nateurlik Gella Vandecaveye en Ulla Werbrouck, mor anderen zien Ingrid Berghmans, Robert Van De Walle (in Ostende geboorn), Johan en Philip Laats, Harry Van Barneveld, Heidi Rakels, Inge Clement en Marie Isabelle Lomba. Soamen en ze zowa 130 medaljes behaald.

[bewerk'n] Polletieker

Na zien periode as judocoach is 'm in de polletiek gestapt, mêer bepoald bie de VLD. Deur zien recht-voe-de-roap mentaliteit et 'm dikwels gebotst met de partietop, moar angezien dat ie nen stemmentrekker is, dorsten ze 'em nie tevele in de weg legg'n toet achter de geminteroadsverkiezieng'n va 2006.

Z'n ôofdprobleem met de VLD was dat 'm voend dat die partie tevele noa links gienk, woardeure da ze veel stemm'n verloor'n an't Vlams Belang. Ander'n zeid'n dat je tevele meedoet met de extreem-rechtsche, en ze doardeure tevele in de koarte speelt. In Ostende stoend 'm tegenover Johan Vande Lanotte van de sossen. Je kost de mêerderheid ni breek'n.

In 2006, achter de gemêenteroad erkiezieng'n et de partie besloot'n, achter de klassieke Dedecker rutteliengen in de gezetten en televisie, en up vrage va Bart Tommelein in Ostende, voe Dedecker uut de VLD te smiet'n.

Vô êene kêe zegt Dedecker nie vele: je vergoadert dattie zwêet, ier en doar, onder andre me Hugo Coveliers en richt ne VZW en polletieken "denktank" en VZW Cassandra ip. Hêel Vloandren es curieus wa datter goa gebeur'n.

Ip 29 november 2006 koendigde em af dat em overstapte no de N-VA. De volgende dag al zei de CD&V da ze 't kartel met de N-VA ni mè zaag'n zitt'n.

Ip 9 december koos de N-VA voo 't Kartel, woarip da Jean-Marie Dedecker de partie nôodgedwongn verliet.

Jean-Marie Dedecker is ôok en polletieker van stunts: in 2002 smokkelde em en journalist toe bie Marc Dutroux. In 2004 hoalden 'm 38% van de VLD stemm'n in en verkiezienge voe VLD-vôorzitter. Een oenverwachs ôoge score, gelet up het verzet van de partietop tegen zien kandidateure.

Jean-Marie Dedecker, as ne doenkerblauwen liberoal, eet iedren n'uchtend, drie groene en êene sos tussen zin stuten; kwestie van de forme t'oen.