Черчесты Алан
Сæрибар энциклопеди Википедийы æрмæг.
Черчесты Георгийы фырт Алан райгуырди 1962 азы 14 апрелы Орджоникидзейы (ныр Дзæуджыхъæу) фыссæг Черчесты Георгийы бинонты.
Каст фæци филологон факультет Цæгат Ирыстоны паддзахадон университеты 1984 азы. 1985 азы бацыди аспирантурæмæ фæсарæйнаг литературæты историйы кафедрæмæ МПУ-йы, æмæ уым ныффыста йæ кандидатон диссертаци дзыллон аивады æмæ беллетристикæйы райхалинаг фарстатыл.
Фæстæдæр сси филологон зонады кандидат, МПУ-йы докторант, дунеон аивадон культурæйы кафедрæйы доцент Цæгат Ирыстоны паддзахадон университеты (ЦИПУ). Лекцитæ касти ЦИПУ-ы 1990-1998 æзты; АИШ-ы штат Индианæйы университеты 1995 азы; куыста æхсæнадæмон отделы сæргълæууæгæй Цæгат Иыстоны зонадон центры 1995-1997 æзты. У дзæуджыхъæуккаг Цивилизацийы институты бындурæвæрæг æмæ ректор, стæй, йæ институт кæй уадзы, уыцы зонадон альманахы сæйраг редактор.
Уымæй уæлдай ма у бирæ зонадон публикациты автор; Германы, АИШ-ы æмæ Норвегийы цалдæр фысджыты æмæ иртасджыты стипендиты стипендиант.
Йæ уацмыстæ фыссы уырыссаг æвзагыл. Ныффыста радзырдтæ «Æмæ уыдзæн сæрд…» («И будет лето»), «Гом сакъадах» («Голый остров»), уацау «Къæвда — иунæг фæндаггон» («Дождь – одинокий прохожий») æмæ романтæ «Цæрæгыл реквием» («Реквием по живущему») æмæ «Дымгæйы цыртыл дидинджытæй быд зилакк» («Венок на могилу ветра»).
Йæ фæстаг романы фæдыл у А. Григорьевы премийы лауреат. Уымæй уæлдай роман ма номинацигонд уыд премийыл «Националон бестселлер».
Черчесы-фырт куыд прозаик йæ уацмыстæ мыхуыр кæны 1990 азæй журналты: «Новый мир» (Ног дуне), «Волга» (Волгæ), «Россия» (Уæрæсе), «Владикавказ», «Знамя» (Тырыса). Тæлмац кæны прозæ англисаг æвзагæй.
Черчесты Аланы цалдæр уацмысы немыцаг æвзагмæ тæлмацгонд æрцыдысты.
