Ûrope du Mitan
From Wikipedia
|
Ch't' articl'ye fut c'menchie en Jèrriais
 |
L' Ûrope du Mitan est eune expression géographique pouor la partie d'l'Ûrope tch'est entré l'Ûrope du Vouêt et l'Ûrope dé l'Êst, l'Ûrope du Nord et l'Ûrope du Sud.
Y'a des difféthents avis sus chein tch'est l'Ûrope du Mitan. Dans l'histouaithe, y'en avait tchi dîthaient qu'ch'est l'Allemangne et les tèrritouaithes d'l'Autriche-Hongrie. Mais si les pays des Balkans sont du Mitan ou d'l'Êst est du d'bat.
Duthant la Fraide Dgèrre, l'idée d'l'Ûrope du Mitan avait pus-à-co dispathu viyant qu'lé continnent 'tait maîntchonné entré l'Vouêt et l'Êst. Mais en r'gângnant la libèrté, des pays voulaient lus distîndgi d'la Russie et tout chein tch'avait 'té d'l' "Êst" en r'cliâmant l'êtitchette dé l'Ûrope du Mitan.
Nou dithait bein qu'ches pays s'trouvent en Ûrope du Mitan:
- l'Allemangne
- l'Autriche
- la Hongrie
- la Polongne
- la Républyique Tchèque
- la Slovaquie
- la Slovénie
Eune partie d'l'Ukraîne es'sait étout en Ûrope du Mitan, et la Croatie s'y compte parfais étout.
