Gulfjellet
Frå Wikipedia – det frie oppslagsverket
Gulfjellet er det høgste fjellet i Bergen og ligg i Arna bydel, med toppen 987 meter over havnivået. Fjellet ligg på grensa mellom Bergen og Samnanger, og ligg i det som lenge har vore eit viktig beiteområde for dei tilgrensande bygdene. Gulfjellet er eit ynda mål for friluftsinteresserte både vinter og sommar, og det vart bygd to redningshytter i fjellet i 1929 og 1935. Den siste av desse vart bygd etter ei ulykke i 1934 som kravde fire menneskeliv.
Svartavatnet, som ligg ved foten av Gulfjellstoppen, har vore nytta som vassmagasin for Janusfabrikken på Espeland. Bergen kommune har overteke vassrettane til det omfattande nedslagsfeltet, og bygde sist på 1980-talet ut vassmagasin, og laga transporttunnellar for vatnet, slik at anlegget no er ein viktig del av den samla vassforsyninga i Bergen.
Det har vore diskusjon om kva namnet Gulfjellet kjem av, men den beste tolkinga er truleg den som peikar på det skarpe skaret i fjellet, som må ha vore eit landemerke lenge før her kom fast busetnad.
