ലിയോ ടോള്‍‍സ്റ്റോയി
വിക്കിപീഡിയ, ഒരു സ്വതന്ത്ര വിജ്ഞാനകോശം.
ലിയോ നിക്കോളെവിച്ച്‌ ടോള്‍സ്റ്റോയ്‌ (സെപ്റ്റംബര്‍ 9, 1828 - നവംബര്‍ 20, 1910) റഷ്യന്‍ എഴുത്തുകാരനും ചിന്തകനുമായിരുന്നു. വാര്‍ ആന്‍ഡ്‌ പീസ്‌ (War and Peace), അന്ന കരിനീന എന്നീ നോവലുകളിലൂടെ ആഗോള പ്രശസ്തനായി. റഷ്യന്‍ ജീവിതത്തിന്റെ തനതായ ആവിഷ്കാരമായിരുന്നു അദ്ദേഹത്തിന്റെ നോവലുകളുടെ പ്രത്യേകത. ഒരു ചിന്തകനെന്ന നിലയില്‍, അക്രമാരാഹിത പ്രതിരോധമെന്ന ആശയത്തിന്‌ രൂപം നല്‍കിയത്‌ ടോള്‍സ്റ്റോയ്‌ ആണെന്നു പറയാം. മഹാത്മാ ഗാന്ധി, മാര്‍ട്ടിന്‍ ലൂതര്‍ കിംഗ്‌ തുടങ്ങിയവര്‍ അക്രമരാഹിത്യമെന്ന ആശയം ഉള്‍ക്കൊണ്ടത്‌ അദ്ദേഹത്തിന്റെ കൃതികളില്‍നിന്നാണെന്നു കരുതുന്നു.
റഷ്യയിലെ ടുള എന്ന സ്ഥലത്താണ്‌ ടോള്‍സ്റ്റോയ്‌ ജനിച്ചത്‌. അഞ്ചു മക്കളില്‍ ഇളയവനായ അദ്ദേഹത്തിന്റെ ചെറുപ്പത്തില്‍ തന്നെ മാതാപിതാക്കള്‍ മരിച്ചു. ബന്ധുക്കളുടെ സംരക്ഷണത്തില്‍ വളര്‍ന്ന ടോള്‍സ്റ്റോയ്‌ കസാന്‍ സര്‍വകലാശാലയില്‍ നിയമവും പൌരസ്ത്യ ഭാഷകളും പഠിച്ചെങ്കിലും ബിരുദമൊന്നും നേടിയില്ല. പഠനം ഇടക്കുവച്ചു മതിയാക്കിയ അദ്ദേഹം ശിഷ്ട ജീവിതം മോസ്കോയിലും സെന്റ്‌ പീറ്റേഴ്‌സ്‌ബര്‍ഗിലുമായി കഴിച്ചു. ചൂതാട്ടം വരുത്തി വച്ച കടങ്ങളില്‍ നിന്നു രക്ഷപ്പെടാനായി 1851-ല്‍ മൂത്ത സഹോദരനൊപ്പം കൌകാസസിലെത്തി റഷ്യന്‍ സൈന്യത്തില്‍ ചേര്‍ന്നു. 1862-ല്‍ സോഫിയ അഡ്രീനയെ വിവാഹം കഴിച്ചു. പത്തൊന്‍പതാം നൂറ്റാണ്ടിലെ ഏറ്റവുമികച്ച നോവലിസ്റ്റായാണ്‌ ടോള്‍സ്റ്റോയ്‌ കരുതപ്പെടുന്നത്‌. സമകാലികരും അല്ലാത്തവരുമായ ഒട്ടേറെ സാഹിത്യകാരന്മാര്‍ അദ്ദേഹത്തെ ഈ നിലയില്‍ വിലയിരുത്തുന്നുണ്ട്‌.
