ചെമ്മനം ചാക്കോ
വിക്കിപീഡിയ, ഒരു സ്വതന്ത്ര വിജ്ഞാനകോശം.
ചെമ്മനം ചാക്കോ (ജനനം. മാര്‍ച്ച്‌ 7, 1926 മുളക്കുളം, കോട്ടയം) മലയാള കവിയും സാമൂഹ്യ പ്രവര്‍ത്തകനുമാണ്‌. കുറിക്കുകൊള്ളുന്ന ആക്ഷേപഹാസ്യ കവിതകളിലൂടെ ശ്രദ്ധേയനായി.
കോട്ടയം ജില്ലയിലെ വൈക്കം താലൂക്കില്‍ മുളക്കുളം എന്ന ഗ്രാമത്തിലാണ്‌ ചാക്കോ ജനിച്ചത്‌. പിതവ്‌ യോഹന്നാന്‍ കത്തനാര്‍ വൈദികനായിരുന്നു. പിറവം സെന്റ്‌ ജോസഫ്‌സ്‌ ഹൈസ്ക്കൂള്‍, ആലുവ യു.സി. കോളജ്‌, തിരുവനന്തപുരം യൂണിവേഴ്‌സിറ്റി കോളജ്‌ എന്നിവിടങ്ങളില്‍ പഠിച്ച്‌ മലയാള സാഹിത്യത്തിലും ഭാഷയിലും റാങ്കോടെ ഓണേഴ്‌സ്‌ ബിരുദം നേടി. കുറച്ചു നാള്‍ സ്വകാര്യ സ്കൂള്‍ അധ്യാപകനായും കോളജ്‌ ലക്ചററായും പ്രവര്‍ത്തിച്ചു. തുടര്‍ന്ന് കേരളാ സര്‍വകലാശാലയില്‍ ചേര്‍ന്നു. അവിടെ മലയാള അധ്യാപകനായും പ്രസിദ്ധീകരണ വിഭാഗം തലവനായും പ്രവര്‍ത്തിച്ചു.
[തിരുത്തുക] രചനാവഴി
വിളംബരം എന്ന കവിതാസമാഹാരവുമായി 1947-ലാണ്‌ ചെമ്മനം ചാക്കോ സാഹിത്യ രംഗത്തേക്കു കടന്നു വന്നത്‌. ഇരുപതു വര്‍ഷങ്ങള്‍ക്കു ശേഷം 1967-ല്‍ കനകാക്ഷരങ്ങള്‍ എന്ന വിമര്‍ശകവിതാ സമാഹാരം പ്രസിദ്ധീകരിച്ചതോടെ പ്രസിദ്ധനായി. തനിക്കു ചുറ്റും നടക്കുന്ന സംഭവങ്ങളെ നേരിട്ടും ആക്ഷേപ ഹാസ്യബിംബങ്ങളിലൂടെയും വിമര്‍ശിക്കുന്ന ശൈലിയാണ്‌ ചെമ്മനത്തിന്റേത്‌. കാവ്യഭംഗിയേക്കാളേറെ വിഷയത്തിന്റെ കാലിക പ്രസക്തിയാണ്‌ അദ്ദേഹത്തിന്റെ കൃതികളെ ശ്രദ്ധേയമാക്കുന്നത്‌. വിമര്‍ശസാഹിത്യത്തിലൂടെ ചെമ്മനം ഒട്ടേറെ വിവാദങ്ങളും വിളിച്ചുവരുത്തിയിട്ടുണ്ട്‌. പത്രലോകത്തെ തെറ്റുകുറ്റങ്ങള്‍ വിമര്‍ശന വിധേയമാക്കിയതിനെത്തുടര്‍ന്ന് കേരളത്തിലെ ഏറ്റവും പ്രചാരമേറിയ മാധ്യമമായ മലയാള മനോരമ പ്രസിദ്ധീകരണങ്ങള്‍ ഏറെക്കാലം ചെമ്മനത്തിന്റെ കൃതികള്‍ തമസ്കരിച്ചിരുന്നു. ഇവര്‍ പിന്നീട്‌ യോജിപ്പിലെത്തി.
[തിരുത്തുക] പുരസ്കാരങ്ങള്‍
രാജപാത എന്ന കവിതയ്ക്ക്‌ 1977-ലും കിഞ്ചനവര്‍ത്തമാനം എന്ന കവിതയ്ക്ക്‌ ഹാസ്യസാഹിത്യ വിഭാഗത്തില്‍ 1995-ലും കേരള സാഹിത്യ അക്കാദമി പുരസ്കാരം ലഭിച്ചു. കുട്ടമ്മത്ത്‌ അവാര്‍ഡ്‌ (ആളില്ലാക്കസേരകള്‍-1992), മുലൂര്‍ അവാര്‍ഡ്‌ (1993), സഹോദരന്‍ അയ്യപ്പന്‍ അവാര്‍ഡ്‌ (1993) എന്നീ പുരസ്കാരങ്ങളും നേടി.
