എന്‍.എസ്‌ മാധവന്‍
വിക്കിപീഡിയ, ഒരു സ്വതന്ത്ര വിജ്ഞാനകോശം.
എന്‍.എസ്‌ മാധവന്‍. നോവലിസ്റ്റും ചെറുകഥാകൃത്തും. മലയാള സാഹിത്യത്തില്‍ അവഗണിക്കപ്പെട്ടിരുന്ന ചെറുകഥകള്‍ എന്ന സാഹിത്യവിഭാഗത്തെ മുഖ്യധാരയിലേക്ക്‌ കൈപിടിച്ചുയര്‍ത്തിയ കഥാകൃത്തുക്കളിലൊരാള്‍. മാധവന്റെ ഭാഷ ജീനിയസ്സിന്റേതാണ്‌, കഥകളാകട്ടെ ജീവിതത്തെ ബോദ്ധ്യപ്പെടുത്തി തരുന്ന പരമാര്‍ത്ഥങ്ങളും.
1948 -ല്‍ എറണാകുളത്ത്‌ ജനിച്ചു. മഹാരാജാസ്‌ കോളേജ്‌, തിരുവനന്തപുരം മാര്‍ ഇവാനിയോസ്‌ കോളേജ്‌, കേരള സര്‍വ്വകലാശാല ധനശാസ്ത്ര വകുപ്പ്‌ എന്നിവിടങ്ങളിലായിരുന്നു വിദ്യാഭ്യാസം. 1975 -ല്‍ ഐ.എ.എസ്‌ ലഭിച്ചു. കേരള സര്‍ക്കാര്‍ ധനകാര്യവകുപ്പില്‍ സ്പെഷ്യല്‍ സെക്രട്ടറി ആയിരുന്നു. 1970 -ല്‍ മാതൃഭൂമി നടത്തിയ ചെറുകഥാ മത്സരത്തില്‍ ശിശു ഒന്നാംസ്ഥാനം നേടി. കേരള സാഹിത്യ അക്കാദമി, ഓടക്കുഴല്‍, പത്മരാജന്‍ അവാര്‍ഡ്-(1994-ല്‍) തുടങ്ങിയ അവാര്‍ഡുകള്‍ ഹിഗ്വിറ്റയ്ക്കു ലഭിച്ചു. കഴിഞ്ഞ നൂറുവര്‍ഷത്തെ ഏറ്റവും മികച്ച പത്ത് കഥകളിലൊന്നായി 'ഹിഗ്വിറ്റ'യെ മലയാള മനോരമ തിരഞ്ഞെടുത്തിരുന്നു.
പ്രസിദ്ധീകരിച്ച കഥാസമാഹാരങ്ങള്‍ ഹിഗ്വിറ്റ, ചൂളൈമേടിലെ ശവങ്ങള്‍, തിരുത്ത്‌, പര്യായകഥകള്‍ എന്നിവയാണ്‌. 2000 -ല്‍ ആദ്യ നോവലായ ലന്തന്‍ബത്തേരിയിലെ ലുത്തീനിയകള്‍ പ്രസിദ്ധീകരിച്ചു.
ഭാര്യ: ഷീലാ റെഡ്ഡി. ഒരു മകള്‍
