Sprimont

Vu Wikipedia, der fräier Enzyklopedie.

Schëld op der Gemeng zu Sprimont

Schoul vu Sprimont

Sprimont an der Provënz Léck

Sprimont ass eng belsch Uertschaft an der Provënz Léck (Wallounien) an Haaptuert vun der Gemeng mat deemselwechten Numm.

[Änneren] D'Uertschaft Sprimont

[Änneren] D'Geographie vum Duerf

Sprimont läit ongeféeier an der Mëtt vun engem laangezunnenne schmuelen Dall wou keng nennenswäert Bach derduerch leeft. Den Dall fänkt zu Chanxhe op der Ourthe op enger Héicht vun 200 m iwwer NN un, a geet mat enger zimmlech liichter a gläichméisseger Steigung erop bis op Héicht vu Louveigné (300 m). Sprimont selwer läit op 225 m.

[Änneren] Verkéier

[Änneren] Stroossen

Zu Sprimont kräze sech zwou Nationalstroossen an zwar d'Nationale 678 déi dem Dall no leeft an am rietse Wénkel derzou d'Nationale 30.

D'Nationale 678 ass och net wäit vu Sprimont mat der Autobunn A26 / E25 Léck-Baaschtnech verbonn.

[Änneren] Eisebunn

Fréier war Sprimont och un d'Eisebunnsnetz ugestréckt duerch eng Vizinalbunn déi vu Poulseur op Trooz gaangen ass. Dësen Zichelchen sollt schonns an de fréie fofzeger Joren ofgeschaaft ginn, huet et dunn awer trotzdeem bis bal an d'Sechzeger gepackt. Ursaach dovu waren d'Dammbréch an Holland, déi grousse Schued ugeriicht haten, wouropper hin d'Hollaänner den Deltaplang an d'Welt gesat hunn, an all hier Däicher vill vergréissert hunn. Do stoung Sprimont mat senge Carriéren mat un éischter Plaz als Liwwerant vu Steng vun alle Kaliberen. Wann een a Zeeland laanscht d'Mier fiert, gesäit ee plazeweis grouss däischter Zyklopesteng leien. Dat ass Pierre bleue vu Sprimont an och aus de Carrièren vun de Nopeschdierfer. Dës Steng si mat der Vizinalbunn bis op Chanxhe transportéiert ginn, wou se op engem speziell duerfir opgeriichten Héichquai an d'Waggonë vun der normaler Eisebunnslinn ëmgeluede gi sinn. De Quai, dee laanscht den Ourthe-Kanal stoung, ass och haut nach ze gesinn.

[Änneren] Geschicht vum Duerf

Steekaul zu Sprimont

D'Geschicht an d'Economie vum Duerf hounge schonns a fréieren Zäiten enk mat de Steekaulen zesummen. Hei goufen d'Steng gebrach fir déi Lécker Paläst, Kierchen a grouss Villaen ze bauen. Steng goufen zënter dem Bau vum Ourthe-Kanal mat klenge Schëffer de sougenannte Betchetten de Floss eraf transportéeirt, bis am Ufank vum 20. Joerhonnert den Zuch dës Charge iwwerholl huet. Zu Sprimont goufen et duerfir eng Hellewull Stengklapperten a Steenheeër déi an de Steekaulen an an den Atelieren ronderëm hiert Brout verdéngt hun.

Zeie vun dëser Vergaangenheet ass de Steemusée zu Sprimont an ee Veräin deen eng Partie vun der Eisebunnsstreck gerett huet, an déi elo als Muséesbunn wiederféiert.

Steekaule selwer sinn och elo nach a Betrib, wann och manner Leit do schaffen.

[Änneren] D'Gemeng Sprimont

Zënter de Gemengefusionen an der Belsch vu 1977 gehéieren déi al Gemengen Sprimont, Louveigné, Dolembreux, Gomzé-Andoumont, Rouvreux, an eng Parti vun der aler Gemeng Comblain-au-Pont (Fraiture-Rivage-Douxflamme) zu dëser neier administrativer Formatioun.

Den 1. Januar 2006 hunn hei 12.782 Leit op enger Fläch vu 74,52 km² gelieft.

[Änneren] Geographie

D'Gemeng läit op engem Plateau, (ausser Sprimont selwer) ronderëm deen d'Däller vun der Vesdre (am Norden), der Ourthe (Westen), der Amblève (Süden) an der Hoëgne (Osten) leien.

[Änneren] Geschicht

D'Gemeng ass bekannt fir d'Granitsteng (Pierre bleue genannt), déi do ofgebaut ginn.

Wann ee vun der Gemeng an de Steekaule schwätzt kënnt een net derlaanscht fir D'Famill Van Roggen ze ernimmen déi vill zum Wuelstand an zu e puer schéine Gebaier zu Sprimont beigedro huet. D'Gemengeverwaltung ass haut an dem Schlass dat dës Steekaulebesëtzer fréier haten, grad sou wéi de Musée de la Pierre deen an deem alen Elektrizitéitswierk vun de Carrièren ënnerbruecht ass.

Op der rietser Säit vun der Amblève ass de Site Belle-Roche, eng Hiel, an deeër déi bis ewell eelsten Iwwerreschter vu mënschlechen Aktivitéiten an der Beneluxgéigend fonnt goufen (ongeféier 500.000 Joer).

De 6. August 1914, hunn d'73. a 74. Infanterieregiment vun der keeserlecher däitscher Arméi 40 Zivilisten erschoss a 60 Haiser zu Esneux um Ufank vun der Invasioun zerstéiert.

[Änneren] D'Schlass van Roggen

D'Schlass van Roggen ass haut d'Verwaltungsgebai vun der Gemeng Sprimont.

D'Gebai ass an zwou Kéieren opgeriicht ginn. De rietse Flillek ass am Ufank vum 20. Joerhonnert vun der Famill van Roggen gebaut ginn. Dee lénksen, dee méi grouss a méi imposant ass, gouf ëm 1920 vun der S.A. Carrières de Merbes-Sprimont gebaut fir do d'Direktioun vun der Steekaul ënner ze bréngen.

An de 1950er Jore gouf d'Schlass un d'Gemeng vekaaft an déi hat wëlles ee Jugendzenter dran ze maachen. Wéi 1977 d'Gemengen duerch Fusion zesummegeklappt gi sinn ass awer décidéiert ginn, d'Verwaltung vun deeër neier Gemeng do dran z'installéieren.

[Änneren] D'Kierch vu Sprimont

Kierch bu Sprimont

D'Kierch vu Sprimont steet op engem Ausleefer vun enger Kopp a kuckt iwwer Sprimont ewech. D'Porkierch vu Sprimont ass dem Hl.Martin geweit. D'Por selwer gehéiert zum Dekanat Ourthe-Amblève-Condroz. Well Sprimont engt Minières-Duerf ass fanne mer och héi och eng stenge Sculptur vun der Hl. Barbara op der Plat virun der Kierch.

[Änneren] Nopeschgemengen

Sprimont stéisst un d'Gemengen Chaudfontaine (Beaufays) an Trooz am Norden, am Westen ass Esneux-Tilff, am Süden Aywaille an am Osten Theux a Pepinster.

[Änneren] Bekannte Leit aus der Gemeng

Henri Simon, Dichter a Poet
Mathieu Van Roggen, Propriétaire vun de Steekaulen
Hubert Pahaut, Steenheeër zu Sprimont
Paul Hanson, Riichter
George Laport, Schrëftsteller an Historiker

[Änneren] Jumelagen an d’Geschicht dervun

Sculptur vun der Hl.Barbara virun der Kierch zu Sprimont

Sprimont ass jumeléiert mat :

Montmagny Frankräich
- De Jumelage mat der Gemeng Montmagny aus dem Val d'Oise geet haaptsächlech op d'Initiative vun der Famill Nisin zréck, déi beim Jumelage vun de Foussballsclibb vun deenen zwou Gemenge bedeelegt war. Doduerch hunn de zwéi Klibb sech vun 1969 un, regelméisseg getraff an an de Joren 1991-92 sinn dann och d'Buergermeeschterë vun deenen zwou Gemenge sech eens ginn an hun de Jumelage offiziell gemaach.

Le Perréon Frankräich
- Dëse Jumelage geet op déi al Gemeng Louveigné zréck. Op Initiativ vun der Gemeng Le Perréon am Beaujolais a vum Geschäftsverband vu Louveigné gouf am Joer 1970 e Jumelage tëschent deenen zwou Gemenge gemaach. All Joer sinn afwiesselnd Besucher gemeet ginn an ët ass flott gefeiert ginn. Et sinn och grouss Frëndschaften tëschend Familljen entstanen. Bei der Fusioun vun de Gemengen 1977 ass dat du weidergefouert ginn. Beim 20. Gebuertsdaag dee feierlech begaange gouf, ware Vertrieder vun der Europäescher Gemeinschaft, an d'franséischt Konsulat vertrueden.

Mamou USA
- De Jumelage mat Mamou am Louisiana war offiziell am September 1998 zu Sprimont an de Géigebesuch zu Mamou war dat Joer duerno bei Geleeënheet vun de Fester vun der Francophonie.

Vineuil Frankräich
- Dëse Jumelage huet 1991 ugefaangen an ass enstanen wëll een Awunner vu Chanxhe an een aus dem Berry sech regelméisseg op Rallyë begéint sinn, an d'Iddi haten, hir zwee Dierfer ze jumeléieren. Zënterhier begéine sech verschidde Familljë regelméisseg fir ee kulturellen Austausch ze hunn, woubäi awer net vergiess gëtt sech z'ameséieren an haaptsächlech gudd ze baffen.

[Änneren] Touristesches an der Gemeng

D’Pilgeruertschaft Banneux

De Steemusée zu Sprimont

Den Zichelche vu Sprimont

D' Belle Roche zu Fraiture eng paleonthologesch Plaz vu virun 500.000 Joer.
D'Monument fir d'Fransousen zu Warnoumont dat drun erënnert datt d'franséisch Arméi hei den Éisträicher 1794 eng verpasst hat. Dës Victoire hat mat sech bruecht dass Sprimont zu Paräis um Arc de Triomphe mat opgezielt ass.
D'Schlass vu Fays. Een alt Härenhaus aus dem Héiche Mëttelalter (als Monument national klasséiert)
D' Maison Forte vun Damré - eng befestegt Plaz vum Ufank vum XV. Jorhonnert
D' Tour de la Dîme zu Louveigné

Ausser dëse Siten kann een an der hiwweleger Géigend vu Sprimont schéin Trëppeltir maachen a seng Heckegéigend mat villen Huelweeër zitt och Reider a VTTisten un.