Perwîz Cîhanî

Ji Wîkîpediya

Perwîz Cîhanî (z. 1955) nivîskarek kurd e. Ew ji Rojhilata Kurdistanê ye lê niha li Swîsre bi cih bûye.

[biguherîne] Jiyan

Perwîz Cîhanî li yekê Gulana sala 1334 ê koçîyê tavî, beranber digel 21.04.1955 ê Z. li gundê Belesora Jêrîn ser bi bajarê Xoyê li Kurdistana Rojhilat li binemaleyeke xwenda û edebdost û torevan da hatiye cîhanê. Hê ji zarotiyê ew li gel çande û wêjeya kurdî û farisî nasyar e.

[biguherîne] Xebatên çandeyî

Perwîz Cîhanî nivîsîna bi zimanê Kurdî li sala 1977 ê ra dest pê kir. Wî pêşî helbestên xwe bo Radyoyên Kurdî ya Ormiyeyê û Radyoya Kurdî ya Kirmancşarê (Kirmanşa) û radyoya Azerî li Tewrêzê dişandin. MIxabin hingê çi helbestên wî di radyoyên kurdî da belav nebûn. Lê yekemîn helbesta wî bi Zimanê azerî li radyoya Tewrêzê havîna sala 1976 ê hate weşandinê. Bi gotina xwe, Perwîz Cîhanî hingê bi êş û azara gelê Kurd û belengaziya wî hesiya.

Dû re wî li sala 1977ê çîroka folklorî ya Gur û Bizinê ji bo zarokan bi helbest nivîsî. Ev çîrok li sala 1978 ê ji alî zangirên kurd li zanistgeha Tewrêzê wek şirît (kasêt) hate weshandinê.

Perwîz Cîhanî li dirêjaya salên 1978-1983 helbestên xwe bi navê nihînî (Şafir Şatoyî) ji Radyoya Kurdî ya Tehranê re dişandin. Hemû jî bêy kêm û kas dihatin weşandinê. Dû re Cîhanî li heman radyoyê wek nivîskar û bejêrê du bernameyên çandeyî xebitî.

Li bihara sala 1984 Perwîz Cîhanî li radyoya Kurdî ya Ormiyê li ser kar bû. Wî du bernameyên toreyî - "Genc û law" û "Ferhenga gel bi Kurmancî" dinivîsî. Herdu bername jî bi dengê wî belav dibûn û pirr guhdar peyda kiribûn.

Perwîz Cîhanî li sala 1984ê helbestvanê navdar Hêmin nas kir û dû re me bi arîkariya çend hevalan dest bi weşandina kovara Sirwe kir. Du helbestên wî - "Bînbera gundê Kurdistanê" û "Metelok" - di yekem hejmara kovarê de weşîn. Cîhanî danê spêdeyê li radyoyê û danê êvarê jî li Sirweyê dixebitî.

Lê vê rewşê dirêj dom nekir. Li sala 1986ê herdu bernameyên wî yên radyoya Ormîyê hatin girtin û ew ji kar hat avêtin. Lê Cîhanî ta payiza 1995ê di Sirweyê de dixebitî. Li dirêjaya wan deh salan bi dehan nivîsar û helbest û kurteçîrokên wî di Sirweyê û çendîn kovarên din yên kurdî de hatin weşandin.

Payiza 1995ê Perwîz Cîhanî neçar ma ku dest kar û warê xwe berde daku xwe ji girtin û kuştinê bifilitîne.

Cîhanî bi taybetî bi lêkolînên xwe yên li ser Mem û Zîna Ehmedê Xanî û herwiha klasîkên kurdî yên din navdar e.

Romana wî ya yekem, Bilîcan, dirêjtirîn romana bi kurmancî ye.

Perwîz Cîhanî niha li ser ferhengek pirr dewlemend ya kurdî - kurdî dixebite.