Triatlón
Na Galipedia, a wikipedia en galego.
O triatlón é un deporte individual e de resistencia, que reúne tres disciplinas deportivas: a natación, o ciclismo e a carreira a pé, por esta orde e ininterrompidamente, de xeito que se realizan unhas transicións altamente regulamentadas entre unha especialidade e outra, sen deixar a proba. A natación pode practicarse tanto en mar como en lago, máis ou menos artificial.
É seguramente un dos deportes máis duros que existen no panorama competitivo internacional actual. Os deportistas que o practican manteñen un severo calendario de adestramentos para poder facer fronte ás esixentes condicións das probas, tanto físicas como psicolóxicas.
Galiza conta con campións de grande renome no triatlón masculino, como Iván Raña ou Xavier Gómez Noia, ademais dunha selección galega de triatlón que competiu internacionalmente en probas da Copa de Europa.
O triatlón foi incluído entre as disciplinas olímpicas nos Xogos Olímpicos de Sydney, en 2000. Administrativamente, o triatlón depende en Galiza da Federación galega de triatlón e pentatlón moderno.
Índice |
[editar] Historia
As primeiras competicións de triatlón comezan en Francia, contra 1920. Nas ribeiras do Marne, en Joinville-le-Pont, nos arrabaldos de París, desputábanse unhas competicións denominadas os Trois Sports (os tres deportes) nos domingos de verán. As probas eran a carreira a pé, o ciclismo e a natación, aínda que ás veces a natación víase substituída polo piragüismo.
Pero o primeiro triatlón moderno, aproximadamente tal e como nós o coñecemos, naceu en Fiesta Island, San Diego, California, en maio de 1975. Sobre unha distancia de 800 metros en natación, 8 km de bicicleta e 8 km de carreira a pé decorreu esta primeira proba, que naceu ao abeiro do culto ao corpo da Costa Oeste.
Con todo, a lenda sinala como punto de orixe do triatlón un evento algo posterior. En 1977, nunha taberna de Hawaii chamada "Le Primo", o capitán de navío veterano da Mariña dos Estados Unidos, John Collins, desafiou os maríns que acababan de vencer o seu equipo de veteranos nunha carreira de relevos a pé. Propúxolles desputar unha competición que agrupase as probas de resistencia máis importantes do arquipélago: a Waikiki Rough Water Swim (3,9 km de natación), a Around Oahu Bike Race (179 km sobre a bicicleta), e mais o maratón de Honolulu (42,195 km a pé). O 18 de febreiro de 1978, 15 candidatos se botan á auga para conseguir o título de ironman, ou home de ferro. O primeiro en chegar foi Gordon Haller, que tardou 11:46'58". Remataron a proba doce. Hawaii segue sendo para moitos a meca do triatlón mundial.
Hoxe en día o triatlón é un deporte consolidado en por si, que non pode considerarse unicamente como a unión de nadar, correr en bicicleta e correr a pé: ten adestramentos, campionatos, técnicas, materiais e metodoloxías particulares, sen contar que é precisamente nas zonas de transición entre unha e outra práctica onde moitas veces se deciden as probas.
[editar] Distancias
| Nome | Natación | Ciclismo | Carreira a pé | Comentarios |
|---|---|---|---|---|
| Super Esprín | 375 m | 10 km | 2.5 km | Pouco frecuente. |
| Esprín | 750 m | 20 km | 5 km | Tamén é frecuente nadar unicamente 500 m nas probas de esprín. É unha distancia en progresión, usada particularmente para as categorías de menor idade. |
| Olímpica | 1.5 km | 40 km | 10 km | É a distancia internacional, usada na maior parte dos triatlóns do mundo |
| Medio ironman | 1.9 km | 90 km | 21.09 | Tamén chamada o "70.3". |
| Longa distancia | 3.8 a 4.0 km | 120 km | 30 km | Esta distancia vén equivalendo ao triplo da distancia olímpica, e está oficialmente recoñecida pola federación internacional |
| Ironman | 3.8 km | 180 km | 42.195 km | A proba de longa distancia, a máis dura de todas. |
Todas as distancias son iguais para homes e para mulleres.
[editar] Principais probas
- Xogos Olímpicos (desde 2000)
- Copa do mundo
- Campionato do mundo
- Copas continentais
[editar] Deportes e especialidades relacionadas
- Ironman
- Acuatlón
- Duatlón
- Cuadratlón
- Triatlón de inverno
- Triatlón de montaña
[editar] Principais triatletas
- Iván Raña
- Xavier Gómez Noya
- David Castro
- Saleta Castro
- Aida Valiño
- Alberte Trillo
- Antón Ruanova
