Bosque da Marronda

Na Galipedia, a wikipedia en galego.

A Fraga da Marronda

Declarada Lugar de Importancia Comunitaria (LIC)
Está localizada no concello de Baleira na provincia de Lugo, entre as entidades da Braña, Mendreiras, Martín e a estrada que une o Cádavo con Martín. A Fraga da Marronda constitúe un magnífico exemplo do bosque autóctono galego que ademais mantén un excepcional estado de conservación. Cunha extensión de 610,64 Ha. solicitada na Rede Natura 2000 e ampliada 1.239 Ha no 2002, e con valores altitudinais comprendidos entre os 500 e 700 metros, medra esta vizosa e fermosa masa natural na que podemos atopar numerosas especies tanto vexetais coma animais.

Son protagonistas da diversidade vexetal as árbores e os arbustos. Entre os representantes da variedade faunística, xa señan animais herbívoros ou depredadores, xa señan aves. Esta impresionante fraga é ademais un tesouro paisaxístico e visual que nos regala estampas cambiantes coas estacións. O conxunto das múltiples especies que conforman esta fraga maniféstase no colorido sempre cambiante e sorprendente con múltiples matices que se acentúan a medida que se aproxima o outono. Na primavera cando comenza a floración, os arrecendos son nidios e embriagan os sentidos, no inverno a neve cobre as formas montañosas e resalta o enguedellado de ponlas e árbores que agardan a chegada da primavera. Podemos gozar desta Fraga realizando a “Ruta da Marronda” na “Variante da Marronda” GR-1.9. Outra forma de observar este bosque é dende a estrada local LU-750, aquí a Fraga precipitase vertical sobre a estrada que transcorre ó longo do río Martín, nun val encaixado e estreito que resulta espectacular de xeito especial cando o sol empeza a ocultarse logo da media tarde. Para os amantes do bosque, A Marronda representa a fraga autóctona practicamente sen alterar. Aséntase nas valgadas dos ríos Martín e o seu afluente, o Souto, con aldeas e lugares pouco poboadas, pero de interese pola tipoloxía arquitectónica de adaptación ao medio montañoso. Por exemplo, os hórreos cadrados ou circulares con teitos de palloza. A mellor forma de achegarse son as estradas locais dende A Braña e Muíña na LU-750 Meira-Baralla; ou mellor, pola recente Gran Rota de Sendeirismo cun percorrido de 66 km.

Flora: castiñeiros (Castanea sativa), carballos (Quercus robur), amieiros (Alnus glutinosa), abidueiras (Betula alba), abeleiras (Corylus avellana), freixo de río (Fraxinus excelsior), salgueiras, pradairos (Acer pseudoplantanus), acevros (Ilex aquifolium), capudres, narcisos (Narcissus cyclamineus), uceiras, carbas, espiños, cerquiños (Quercus pyrenaica), arandos xunto cun bo número de especies arbustivas, na que tamén podemos atopar poboacións de faias (Fagus sylvatica) nalgunhas zonas especialmente umbras no que constitúe unha parte do límite suroccidental da faia en Europa, convertíndose por tanto nunha das máis importantes reservas de faias en Europa suroccidental.

Fauna: xabarín, corzo, raposo, lobo, xineta, donicela, garduña, esquiu, rato de almiscre (Galemys pyrenaicus), comadrexa, gato bravo, numerosas especies de pequenos reptís e anfibios, aves coma o azor (Accipiter gentilis), piquelo azul (Sitta europaea), rubideiro (Certhia brachydactyla), paporrubio real (Pyrrhula pyrrhula), gabián (Accipiter nisus), lontra (Lutra lutra), miñato abelleiro (Pernis apivorus), águia caudal, falcón peregrino, e unha longa lista de pequenas aves insectivas e granívoras, reptis coma a saramaganta (Chioglossa lusitanica), o lagarto das silvas (Lacerta schreiberi) e invertebrados coma a vacaloura (Lucanus cervus) o caracol (Elona quimperiana) e a lesma (Geomalacus maculosus).,

ROTA DA MARRONDA

Tipo: Gran percorrido

Área: Concello de Baleira

Percorrido: Fonteo, Vilares, Pereira, O Cádavo, Estornín, Cubilledo, Cabreira, Piñeira, A Cortevella, Mendreiras, A Braña e Fonteo.

Distancia: 66 quilómetros

Dificultade: Alta

Duración: 18 horas

Datos de interese: O camiño parte de Fonteo e desenvólvese entre castiñeiros e carballos por toda a Serra do Pozo, no Concello de Baleira. Cómpre salientar a mesta fraga da Marronda, na derradeira etapa do camiño.