For di Avoltri

De Vichipedie, la enciclopedie libare dute in marilenghe.

For di Avoltri
Figure:Forni Avoltri-Stemma.png
Non ufiziâl par talian	Forni Avoltri
Provincie	Udin
Part	Cjargne
Altitudin	888 m s.n.m
Superficie	80,71 km²
Popolazion	692 ab.
Densitât	9 ab/km²
Frazions	Plans di Luce loc. ju Plans in Luço, Frassenêt loc. Frasseniet, Sighiet, Culine piçule loc. Culino piçulo, Culine loc. Culino.
Comuns confinants	Lesachtal (AT-2), Paluce, Prât, Rigulât, Sant Stiefin in Cjadovri (BL), Sapade
CAP	33020
Prefìs telefonic	0433
Patron	Sant Laurinç
Sît istituzionâl
Cjale il Progjet comuns

For di Avoltri (loc. lu For oben For Davùatri) al è un comun inte Cjargne, che al dì di vuê al fâs part de provincie di Udin e al à 732 abitants.

Indis

1 Gjeografie
2 Storie
3 Di viodi
4 Culture
- 4.1 Lenghe
- 4.2 Fiestis e acjadiments impuartants
5 Aministrazion comunâl
6 Galarie fotografiche

[cambie] Gjeografie

Il paîs al è logât a 888 m tal Cjanâl di Guart, inte Cjargne, e al è l'ultin paîs dal Friûl-Vignesie Julie prime di jentrâ in Venit tal comun di Sapade (che ancje se al fâs part dal Friûl storic, al dî di vuê al è sot de provincie di Belun). Lis sôs frazions a son:

For (Cjâflûc, 888 m)

Davuàtri (907 m)

Frassenêt (1089 m)

Sighiet (1121 m)

Culine Piçule (1200 m)

Culine (1250 m)

A son po di zontâ a chescj lis localitâts di

Plans di Luce (1036 m)

Pierabec, dulà ch'al è logât il stabiliment di imbutiliament de aghe Gote di Cjargne (Goccia di Carnia).

[cambie] Storie

Probabilmentri For di Avoltri al nassè in graciis da lis minieris di fiâr, ram e aur che a si cjatavin dongje il paîs, e al somee che il non For al vegni propite da la presince dai antîcs fors par fondi i minerâi tirâts fûr da la Navanze e da la Davuatri. Salacor il non di Avoltri invezit al ven dal latin ab ultra, di là da l'aghe (la aghe e jere che dal Dean). La storie di For e va daûr di chê dal Friûl: al fasè part dal patriarcjât di Aquilee fin al 1420, an in cui il patriarcjât al fo concuistât de Republiche di Vignesie. Cul tratât di Cjampfuarmit, il paîs al passà sot l'imperi austro-ongjarês, par tornâ a la Italie tal 1866, daspò la tierce vuere di indipendence. Te prime vuere mondiâl, jessint che il paîs al si cjatave in zone di vuere, la popolazion e fo menade vie e il paîs al fo bombardât dai austriacs. Dilunc la seconde vuere mondiâl, daspò da l'armistizi dal 8 di setembar, tes monts di For operarin i partesans ch'a cumbaterin cuintri i cosacs, rivâts in paîs tal 1944, e i todescs, ch'a bombardarin For e la frazion di Sighiet. Tal 1966 il comun al fo devastât di une tremende montane.