Basse furlane
De Vichipedie, la enciclopedie libare dute in marilenghe.
La Basse furlane (o ancje in curt dome Basse o Bassa inte part orientâl) e je une regjon dal Friûl che e je par solit delimitade de Lagune di Grau e Maran a sud e a nord des risultivis, che a si espandin plui o mancul tra Palme e Codroip; a est il confin al pues jessi considerât il flum Lusinç. In chestis zonis lis aghis filtradis inte plane plui alte a vegnin fûr, creant un grum di roiis e di torents; par vie de pendence basse, spes l'aghe e reste ferme, e si formin cussì palûts e laguts; tal mieç, graziis al teren ric di arzile e savalon, a cressin boscs.
[cambie] Sudivisions
Jenfri de Basse, a si podin fâ ancje altris divisions; la plui cognossude al dì di vuê e je chê tra Basse orientâl e Basse ocidentâl. La prime e je chê aree che e je plui leade a Çarvignan, par vie de lungje permanence sot dal Imperi Asburgjic, ma ancje a Palme; inte Basse ocidentâl invezit a son in gjenar includûts i paîs che a cjalin plui a citadinis come Tisane, Sant Zorç di Noiâr e plui a nord Codroip.
[cambie] Storie
Chestis tieris a forin bonificadis za ai timps dai Romans, ma dutis lis oparis a larin pierdudis tai timps sucessîfs; la riprese dai tentatîfs di cambiâ la struture dal teritori e fo dome dal XIX secul, cuant che si scomence a viodi il paisaç agricul che al reste ancjemò vuê, cui cjamps e ator stradis e canâi drets, dispès cun a flanc filis di pôi. Chest, pûr miorant lis condizions de int, al causà une disparide dai antîcs boscs, che a restin dome in pôcs puescj. Cun la creazion dai colegaments stradâi, inte Basse e scomence ancje un disvilup industriâl, sei leât ae agriculture (par esempli tal câs di Tor di Zuin, cu la lavorazion de celulose), sei no leât (par esempli inte aree industriâl dal Ausse-Cuar, dulà che si à la pussibilitât di vê trê mieçs di comunicazion, ferovie, strade, puart). Purtrop dut chest al à ancje puartât problemis come l'incuinament.
[cambie] La Basse vuê
Vuê la Basse e je une regjon centrâl inte gnove regjon Friûl-Vignesie Julie. Çarvignan al è un impuartant centri feroviari, cuntun voli sul cumierç cui paîs de Mitteleurope; impuartant al è ancje il rôl dal turisim: Aquilee al è un dai plui famôs centris di origjin romane, e la basiliche e je un des testemoneancis plui fuartis de epoche paleo-cristiane. Grau e Lignan a son metis turistichis di rilevance internazionâl, e la lagune di Grau e Maran e ufrìs un esempli di ambient naturâl incontaminât. E no si pues dismenteâ la fuartece di origjin veneziane di Palme, grandiôs esempli di urbanistiche dal Rinassiment, e simpri plui spes sêt di mostris in gracie ae posizion centrâl inte regjon.
