Rudolf Hess
De Uiquipedia
Rudolf Hess o Heß (26 d'abril de 1894, Alexandría, Exiptu - 17 d'agostu de 1987) foi un políticu alemán, figura clave de la Alemaña nazi.
Al entamar la Primera Guerra Mundial taba a puntu d'ingresar na Universidá d'Oxford, pero alistose nel exércitu alemán como voluntariu del 7u Batallón d'artillería bávaru, onde-y dieron la Cruz de Fierru por dos heríes, una d'elles grave nel pulmón izquierdu.
En 1919 conoció a Adolf Hitler nun mitin y un añu depués incorporose al Partíu Nacional Socialista Alemán de los Trabayadores (NSDAP n'aleman). Formó parte del Putsch de Múnich de 1923 y compartió celda con Haushofer y Hitler, al qu'ayudó a escribir el llibru Mein Kampf. En 1925 foi secretariu políticu de Hitler, entamando les sos actividaes polítiques.
Pa 1927 casose con Lise Pröhl. Cinco años depués designáronlu Presidente del Comite Central Nazi y en 1933 salió elexíu parlamentariu del Reichstag. Cuando Hitler algamó'l poder a él dieron-y los cargos de xefe del partíu nazi y Ministru d'Estáu, convirtiéndose nel segundu na xerarquía nazi.
En 1941 foi apresáu nel Reinu Uníu nun viaxe qu'anguañu ta sin aclarar. Paez ser que buscaba negociar colos británicos la paz pa que'l réximen nazi pudiera centrase n'atacar a la URSS, anque esta esplicación nunca la aceptó Hitler, que dixo que yera un llocu y un traidor.
Morrió na cárcel de Spandau a los 93 años, sin haber vuelto a tar en llibertá dende que lu apresaran nel Reinu Uníu.
