Murasaki Shikibu
De Uiquipedia
Murasaki Shikibu (紫 式部, c. 978-?, c. 1014) Escritora xaponesa. Nació na mitá del periou Heian como fía del lletráu y lliteratu Fujiwara no Tametoki, de una familia de funcionarios de la nobleza mediana, magar que parientes llonxanos de la poderosa familia Fujiwara.
Recibiere una curiosa educación. Casóse con un noble de clas social averada a la de so, Fujiwara no Nobutaka, que murriera tres de que tuvieran una fía. Nesti contextu creó la so novela El relatu de Genji, de calter realista, y que-y apurrió abonda popularidá que-y llevó a entrar na corte de la emperatriz Akiko como dama de compaña hasta l'añu 1013. Un añu depués morrió y la so tumba consérvase na capital antigua, Kyoto.
Ye autora del diariu (Murasaki Shikibu Nikki) y del Genji monogatari, la novela psicolóxica más vieya de la lliteratura universal y la más importante de la lliteratura xaponesa clásica.
Genji monogatari cuenta la vida y aventures amoroses del fictíciu príncipe Hikaru Genji ("Príncipe Rellumante") y les de los sos descendientes pente 54 capítulos. Sicasí, el relatu ta enllenu de toa mena de narraciones que faen que la obra ufierte una bayura de descripciones so la sociedá xaponesa de la época.
Escribió tamién una serie de poemes que la clasificó ente los nomaos "Trenta y seis grandes poetes" de la época.
[editar] Enllaces esternos
- Murasaki Shikibu (n'español)
