Johnny Weissmuller

De Uiquipedia

Johnny Weissmuller, del que'l so nome orixinal yera János Weißmüller, nació na ciudá austro-húngara de Szabadfalu, que güei forma parte de la ciudá de Timisoara en Rumanía, el 2 de xunu de 1904 y morrió n'Acapulco (México), el 20 de xineru de 1984, nadador y actor cinematográficu estaunidense, d'aniciu rumanu.

[editar] Biografía

Cuando Johnny tenía siete meses la so familia emigró a Estaos Uníos. Partieron del puertu de Rotterdam nel S.S. Rotterdam, el 14 de xineru de 1905, y llegaron a Nueva York doce díes más tarde consiguiendo algamar esta nacionalidá. So padre y so madre, Petrus Weißmüller y Erzsebet Kersch, a la llegada a Estaos Uníos, rexistráronse como Peter, Elizabeth y Johann Weissmuller.

Depués d'una curtia estancia en Chicago, instaláronse nel pueblu de Windber (Pennsylvania), onde'l padre trabayó como mineru.

Llegó a casase un total de cinco veces: cola cantante Bobby Arnst (ente 1931 y 1933), l’actriz Lupe Vélez (ente 1933 y 1939), Beryl Scott Ginter (ente 1939 y 1948), Allenne Gates (ente 1948 y 1962 y María Bauman (dende 1963 hasta la so muerte en 1984).

Cola so tercera muyer, Beryl, tuvo tres fíos, Johnny Scott Weissmuller (o Johnny Weissmuller, Jr., tamién actor) (nacíu'l 23 de setiembre de, 1940), Wendy Anne Weissmuller (nacida'l 1 de xunu de 1942) y Heidi Elizabeth Weissmuller (31 de xunetu de 1944 - 19 de payares de 1962).

Weissmuller sufrió dos de derrames cerebrales ente 1976 y 1978. Nel añu 1979 foi paciente del Motion Picture & Television Country House and Hospital en Woodland Hills (California). Más tarde él y la so última muyer, María, cambiaron la so residencia a Acapulco, onde se localizara la so última película de Tarzán. Nesta ciudá morrería d'un edema pulmonar a los 79 años d’edá.

[editar] La so carrera como nadador

La so popularidá algamóla primeramente como nadador. Entamó a practicar esti deporte con 15 años, siendo naquella dómina'l so entrenador Big Bill Bagrach. Bien ceo destacó como gran nadador, llegando'l 9 de xunetu de 1922 a batir el récord del mundu de los 100 m llibres con un tiempu de 58’ 6", baxando asina por primera vez del minutu y de los 400 llibres con 4'57" en 1923, baxando de los cinco minutos.

Participó nos Xuegos Olímpicos de París de 1924 y nos d'Amsterdam de 1928 y consiguió un total de cinco medalles d'oro en 100 y 400 m llibres y 4 x 200 m nos de 1928, batiendo nuevamente les sos propies plusmarques.

Foi precisamente nes Olimpiaes de París onde participó nel tornéu de waterpolo, consiguiendo la medalla de bronce. En tola so carrera algamó 52 veces el puestu de campeón de Estaos Uníos, y 67 récords del mundu en metros y yardes en toles distancies comprendíes ente los 100 y los 800 m llibres.

Una de les particularidaes de Johnny Weissmuller yera la de nadar l'estilu llibre cola cabez fuera del agua, métodu abandonáu dafecho depués.

[editar] La so carrera como actor

Depués de la so carrera como nadador, Weissmuller firmó en 1929 un contratu cola empresa BVD pa actuar como modelu y representante. Viaxó a lo llargo del país con espectácúlos de natación promocionando ropa deportiva, firmando autógrafos y dando conferencies. Nesi mesmu añu protagoniza la so primera película apareciendo como Adonis na película titulada Glorifying the American Girl.

Pero la so carrera como actor entamó realmente cuando firmó un contratu por siete años cola Metro-Goldwyn-Mayer cola qu'entamó a interpretar el papel de Tarzán en Tarzan the Ape Man (1932). La película tuvo un sonoru ésitu internacional, prestando-y notablemente al creador del personaxe, Edgar Rice Burroughs.

Weissmuller protagonizó a Tarzán en seis películes entamaes pola MGM cola actriz Maureen O'Sullivan como Jane. Les tres últimes incluyeron a Johnny Sheffield como Boy. Cola compañía RKO, Weissmuller protagonizó seis películes más de Tarzán. Sheffield apaeció como Boy nes primeres cinco rodaes con esos estudios. La nueva compañera yera Brenda Joyce, que interpretó a Jane nes cuatro últimes películes que Weissmuller fizo como Tarzán, papel al que-y daría vida nun total de doce producciones, convirtiéndolu nel actor más conocíu de tolos qu'interpretaron esi papel. Aunque nun foi el primer Tarzán n’apaecer nes pantalles de cine (esi honor foi de Elmo Lincoln), Weissmuller fue’l primeru al que se-y asocia'l tradicional glayíu.

Cuando finalmente dexó'l papel de Tarzán, darréu vivió otres aventures na xungla interpretando otru personaxe en 1948, “Jungle Jim”, colos estudios Columbia Pictures. Fizo trenta películes de Jungle Jim ente 1948 y 1954. L'añu siguiente, apaeció en tres películes de la selva más, interpretándose a si mesmu. En 1955, Weissmuller foi’l productor de la serie Jungle Jim pa la televisión de la que se rodaron 26 episodios.

Les sos películes fueron prohibíes na Alemaña Nazi debío a los sos raigaños xudíos.