Peter Hyams

Us der alemannische Wikipedia, der freie Dialäkt-Enzyklopedy

Dr Peter Hyams (* 26. Juli 1943 in New York) isch e US-amerikanische Regisseur.

Dr Suhn vum Broadway-Agent Barry Hyams un sinere Frau Ruth het im Alder vu 17 Johre e Chunst- un Musikstudium an dr Syracuse University agfange un sich e Namme as e Jazz-Schlagzüger gmacht. Er het u.a. mit em Bill Evans un em Maynard Ferguson in dr New Yorker Nachtclubs gspilt. Nooch sinem Studium het er 1964 si Arbet bim Sender NBC as Noochrichtesprecher agfange. Sälli Arbet isch ihm nit besunders gläge, doher isch er nooch Vietnam gange un het dert e Chriegsdokumentation drillt. Es sin witeri Dokumentatione fer s'Fernsähe gfolgt, fer des er au witterhi as Chefnoochrichtesprecher gschafft het.

Anno 1970 het dr Hyams si Drillbuech fer Tanja Baskin – Anruf genügt an d'Paramount Filmgsellschaft verchauft. Er isch dodruff nooch Los Angeles gange un het d'Verfilmig um e Maidli vum Land, wo z'Chicago si Glück mache will, verfilmt, mit em Herbert Ross as Regisseur un dr Candice Bergen in dr Hauptrolle. Es sin witteri Produktione fer s'Fernsehe gfolgt, bis er anno 1974 mit Spur der Gewalt si Debüt as Filmregisseur git. Dr Film verzellt d'Geschichte vume Polizistepaar, dem si Idealismus im Lauf vu dr Handlig schwindet.

Mit Unternehmen Capricorn het er e vilbeachtete un kommerziell erfolgriiche Science-Fiction-Film yber e ersti bemannti Marslandig drillt, wo aber numme vordüscht isch un mit dere 'Öffetlichkeit hinders Liecht gfüehrt werre soll. Säller Film het natürlich au entsprechendi Muetmassige yber d'Mondlandige beflüegelt.

Es sin dr Actionfilm Das tödliche Dreieck mit em Harrison Ford un dr Weltruumwestern Outland – Planet der Verdammten mit em Sean Connery gfolgt. 1983 isch e Ein Richter sieht rot mit em Michael Douglas erschine. Usserst zwispältig sin d'Reaktione uf d'Verfilmig vu 2010 – Das Jahr, in dem wir Kontakt aufnehmen mit em Roy Scheider in dr Hauptrolle vum Dr. Floyd gsi. Dr Film isch nooch ere Vorlag vum Arthur C. Clarke enstande, wo säller as Fortsetzig vu sinem Film (nit direkt vu sinem Buech) 2001 - Odyssee im Weltraum gschribe het. Dr Regisseur Stanley Kubrick het mit 2001 dr perfekte Science-Fiction-Film gmacht un dr Hyams isch dodra gmesse worre un het d'Vorlag natürlich nit erreicht, obwohl 2010 e solide Film gsi isch, wo au dr domolig Wissensstand vum Jupiter un sine Mönd agmesse berucksichtigt. In wittere Filme isch dr Hyams no im Action-Genre treu bliibe. Presidio (ebefalls mit em Sean Connery), Narrow Margin – 12 Stunden Angst hän spannendi Underhaldig ohni Diefgang gliferet. Time Cop un Sudden Death hän dr Jean Claude van Damme bechannter gmacht. D'Gsellschaftssatire Stay Tuned - Höllische Spiele isch degege gfloppt. D'Produktione Das Relikt un End of Days – Nacht ohne Morgen hän vor allem Spannig un visuelli Effekte botte, um dere ihr Witterentwicklig dr Hyams sich sit 2010 besunders bemüeht het.

Dr Peter Hyams schribt nit bloss fer vili vu sine Filme s'Drillbuech selber, als einziger Hollywood-Topregisseur isch er au fast immer si eigene Kameramann. Er läbt un schafft z'Los Angeles.

[ändere] Filmographi (Uswahl)

1971 Tanja Baskin - Anruf genügt (T.R. Baskin; numme als Produzent)
1974 Spur der Gewalt (Busting)
1978 Unternehmen Capricorn (Capricorn One)
1979 Das tödliche Dreieck (Hanover Street)
1980 Outland – Planet der Verdammten (Outland)
1983 Ein Richter sieht rot (The Star Chamber)
1984 2010 - Das Jahr, in dem wir Kontakt aufnehmen (2010)
1988 Presidio (The Presidio)
1990 Narrow Margin – 12 Stunden Angst (Narrow Margin)
1993 Stay Tuned - Höllische Spiele/Mit der Fernbedienung in die Hölle (Stay Tuned)
1994 Time Cop
1995 Sudden Death
1996 Das Relikt (The Relic)
1999 End of Days - Nacht ohne Morgen (End of Days)
2001 The Musketeers
2005 A Sound of Thunder

[ändere] Webgleich

Peter Hyams in de Internet Movie Database

Persoonedaate
NAME:	Hyams, Peter
ALTERNATIVNAMEN:
KURZBESCHREIBUNG:	US-amerikanischer Regisseur
GEBURTSDATUM:	26. Juli 1943
GEBURTSORT:	New York City, N.Y:
STERBEDATUM:
STERBEORT: